Musylman fýtbolshylar Ramazandy qalaı ótkizedi?
ASTANA. QazAqparat - Tórtkúl dúnıeniń nazaryn teńbil dopqa aýdarǵan ataqty fýtbol chempıonaty bastaǵaly álem musylmandary da alańdaı bastady. Jasyl alańda oıyn kórsetetin baýyrlastarynyń aýyz bekitip, oraza ustaýy - jan alyp, jan berisken jantalas oıyn ústinde naǵyz synaq bolǵaly tur, dep jazady muslim.kz.
Osy aıdyń 28 juldyzy kúni bastalatyn Ramazannyń jartysyna jýyq ýaqyty álem chempıonatynyń ábigerimen tuspa-tus keledi. Bundaı sáıkestik sońǵy ret 1986 jyly bolǵan eken. OnIslam.net basylymynyń habarlaýynsha, fýtbolshylardyń keıbiri mı qaınatar shildeniń aptabyna qaramastan aýyz bekitetinderin málimdese, endi bireýleri ózderiniń ustazdaryna qazasyn keıin óteýge bolmas pa eken degen saýal joldaýda.
Dúbirli dop dodasynyń chempıondyǵyna talasatyn quramalar quramynda musylman oıynshylarynyń qatary da birshama. Máselen, Frantsııa quramasynda belgili oıynshylary - «Real» sapyndaǵy Karım Benzema men «Arsenaldyq» Bakarı Sanıa, «Nıýkasldyq» Mýssa Sıssoko men «Lıverpýldik» Mamadý Saho esimdi oıynshylar -bes ýaqyt namazyn oqyp, asyl dinimizdi berik ustanyp júrgender. Sondaı-aq, baýyrlastarymyzdyń qataryn Kot-d'Ivýarlyq aǵaıyndy ıAıa men Kolo Týre jáne aǵylshyn klýbtarynda óner kórsetetin Jervınıý men Sheıh Tote de tolyqtyrady. Jáne de Belgııa quramasynyń beldi oıynshylary Marýan Fellaını men Mýssa Dembele de, shveıtsarııalyq Djerdan Shakırı de, Germanııa quramasyndaǵy Mesýt Ozıl men Samı Hedıralar - mańdaıyn sájdege usynǵan musylmandar Aıta keteıik, ıvýarlyq Kolo Týre eshqandaı qıyndyqqa qaramastan, oraza ustaıtynyn qazirden málimdep qoıdy. «Ózim úshin oraza ramazannyń alǵashqy bes kúni ǵana qıyndyq týdyrady. Keıinnen aǵzamyz úırenisip ketedi. Sol shaqtarda men ózimdi keremet sezinemin», - deıdi ol.
