Musylman elderi «Nuh» fılminiń prokatynan bas tartyp jatyr
ASTANA. QazAqparat - Katar, Bahreın jáne Birikken Arab Ámirlikteriniń retteýshi organdary Darren Aronofskıdiń dúnıeni topan sýdyń jaılaǵany jaıyndaǵy «Nuh» atty fılmine prokattyq kýálikter berýden bas tartty. Dál osyndaı qadamǵa Iordanııa, Kýveıt pen Egıpet te barady dep kútilýde. Sonyń ishinde Egıpette atalmysh fılm ekranǵa 26 naýryzda jol tartýy kerek bolatyn. Bul týraly Paramount kınokompanııasyna silteme jasap The Hollywood Reporter habarlaǵan.
Toqtala ketetin jaıt, musylman dástúrlerine oraı paıǵambarlar men Allanyń Elshilerin fılmderde somdaýǵa, beıneleýge jol berilmeıdi. Sondyqtan da, Taıaý Shyǵys elderinde osyndaı shekteý jasalyp otyr. Sonymen qatar, ıslamda Nuh paıǵambar aıtýly bes paıǵambardyń birinshisi ári Onyń beınesi fılm sıýjetinde álemdik topan sýǵa oraı qatystyrylyp otyr.
Eske sala keteıik, buǵan deıin Paramount kompanııasy «Nuh» fılmine qatysty qosymsha túsindirýler arqyly jarnamalyq materıaldar jasap, onda kartınanyń kórkem týyndyǵa negizdelgenin, al Nuh paıǵambar týraly injil tarıhynyń túpnusqasyn «Bytııa» kitabynan oqýǵa bolatynyn qamtý týraly sheshim qabyldaǵan edi. Sonymen qatar, stýdııa kórermenderdiń ashý-yzasyn týdyrmas úshin týyndynyń birneshe nusqasyn ázirlegen bolatyn. Buǵan qosa, Aronofskı avtorlyq nusqanyń prokatyn ótkizýge baryn salǵan edi. Aronofskıdiń jańa týyndysynda basty róldi Rassel Kroý somdaıdy, onymen qosa fılmde Emma Ýotson, Djennıfer Konnellı, Entonı Hopkıns pen Reı Ýınston oınaıdy.
