«Musylman baýyrlar» qozǵalysynyń 700-ge jýyq múshesi ólim jazasyna kesildi
ASTANA. QazAqparat - Mysyr soty «Musylman baýyrlar» qozǵalysynyń kóshbasshysy Muhammed Badı men atalǵan ıslamıstik qaýymdastyqtyń 682 múshesin ólim jazasyna kesti, dep habarlaıdy euronews.com.
Mundaı úkim Ál-Mınıa provıntsııasynyń ońtústik sotyndaǵy otyrysta shyǵaryldy. Oǵan qosa, buǵan deıin ólim jazasyna kesilgen 529 "ıslamshynyń" 37-siniń úkimi qaıta bekitildi. Qalǵandarynyki ómir boıyna bas bostandyǵynan aıyrý jazasyna aýystyryldy. Sottalýshylar polıtsııa ýchaskesine shabýyl jasap, tártip saqshylarynyń ólimine kináli dep tanyldy. Qorǵaýshylardyń kópshiligi sýdıany aýystyrýdy talap etip boıkot jarııalaǵan. Alaıda olardyń suranystary qanaǵattandyrylmady. Sotqa qatysýshy bireýdiń sózine qaraǵanda, sot otyrysy bes mınýttan aspady.
