Mustafa Shoqaıdyń ǵylymı murasyn kópshilik nazaryna alyp shyǵý halqymyzdyń otansúıgishtik sanasyn sharyqtatady-Almatydaǵy konferentsııa
ALMATY. 18 qarasha. QazAqparat /Názıra Eleýhan/ - Mustafa Shoqaıdyń eńbekteri halqymyzdyń ótken jolyn tarıhı shyndyq turǵysynan qarastyrýda, jas urpaqty patrıottyq rýhta tárbıeleý úshin asa qundy qazyna bolyp tabylady.
Bul týraly búgin Almatyda ótip jatqan «Mustafa Shoqaıdyń ǵylymı murasy jáne qazirgi zaman» atty halyqaralyq ǵylymı konferentsııa barysynda R.B.Súleımenov atyndaǵy Shyǵystaný ınstıtýtynyń dırektory, tarıh ǵylymdarynyń doktory, professor Merýert Ábýseıitova aıtty.
Onyń aıtýynsha, Mustafa Shoqaı Qazaqstannyń táýelsiz gúldengen memleket bolyp, álemdik qaýymdastyqta óz ornyn alatynyna eshbir kúmándanǵan emes. «Onyń qaıratkerlik bar kúsh-jigeri Qazaqstan, Kavkaz jáne Orta Azııa halyqtarynyń azattyǵy men táýelsizdigi úshin kúreske jumsaldy. Onyń birqatar Eýropa qalalarynda (Parıj, London, Berlın, Varshava, Jeneva jáne t.b) jurtshylyq aldynda sóılegen kóptegen sózderinde, sonymen qatar, eýropa jáne shyǵys tilderinde -orys, aǵylshyn, frantsýz, polıak, shaǵataı tilderinde jarııalanǵan eńbekterinde álemdik qaýymdastyqqa qazaq halqynyń qysymshyl-totalıtarlyq júıege qarsy táýelsizdik úshin kúresiniń zańdy da ádiletti sıpatyn jetkizip otyrdy. Ol ortalyqazııalyq aımaqtyń tarıhy men mádenıetin zertteýge baǵa jetpes úles qosyp, bolashaq táýelsiz Qazaqstannyń ishki jáne syrtqy saıasatynyń negizgi baǵyttaryn belgilep ketti»,-dep atap ótti konferentsııa barysynda Merýert Ábýseıitova.
Onyń pikirinshe, Mustafa Shoqaıdyń ǵylymı murasyn kópshilik nazaryna alyp shyǵý halqymyzdyń otansúıgishtik sanasyn sharyqtatyp, birtutas qazaqstandyq qoǵamnyń qalyptasýyna septigin tıgizbek.
Konferentsııa qatysýshylarynyń aıtýynsha tuńǵysh ret ótkizilip otyrǵan konferentsııa jáne basqosý barysyndaǵy kóteriletin máseleler tyń zertteýlerge túrtki bolyp, HH ǵasyrdyń basyndaǵy túrki-musylman halyqtary tarıhynyń kúrdeli máseleleriniń kúrmeýin sheshýde ózindik oryn alýyna yqpal etpek.
Mustafa Shoqaı (1890-1991jj.)- óz zamanynyń kórnekti memleket qaıratkeri, «Alash» qozǵalysynyń bedeldi qolbasshylarynyń biri, tarıhshy-ǵalym, pýblıtsıst.
