Mustafa Shoqaıdy satqyn dep kóretinder áli bar - ǵalym Á.Qara
ASTANA. 8 aqpan. QazAqparat /Arman Asqarov/ - Orys ǵalymdarynyń arasynda Mustafa Shoqaıǵa áli kúnge deıin satqyn dep qaraıtyndary bar.
Búgin Astanada ótken jıynda belgili ǵalym, professor Ábdiýaqap Qara osy máseleni erekshe atap ótti.
«Demek, olar qazaq ǵalymdarynyń jetistikterinen múldem habarsyz. Olar sol baıaǵy derektermen sóılep, Mustafa Shoqaıdy áli kúnge deıin satqyn dep otyr. Árıne, olar óz múddesin oılap jatqan bolar. Biraq biz qazaq tilindegi zertteý eńbekterin orysshaǵa aýdaryp, orys ǵalymdarynyń búgingi kózqarasy teris ekendigin dáleldeı bilýimiz qajet. Qazir olar «qazaqsha bilmeımin» dep syltaýratady. Al barlyq dálelder orys tilinde bolsa, olar moıyndaýǵa májbúr bolady», - deıdi Á.Qara.
