Mustafa Shoqaı jaıly kitap ózbek tilinde jaryq kórdi
TAShKENT. KAZINFORM – Ózbekstannyń ulttyq kitaphanasynda Mustafa Shoqaı týraly ózbek tilinde jaryq kórgen kitaptyń tusaýkeseri ótti, dep habarlaıdy Kazinform agenttiginiń menshikti tilshisi.
Týyndyny ózbek tiline tarıh ǵylymdarynyń kandıdaty, aýdarmashy Nazarbek Rahım tárjimalaǵan. Atalǵan eńbek latyn jáne kırıll álipbıinde jaryq kórdi.
- Jalpy, osyǵan uqsas kitaptardy aýdarýǵa birneshe jyl ýaqyt ketedi. Alaıda, maǵan Mustafa Shoqaı jaıly jazylǵan týyndynyń qyzyq bolǵany sonshalyq, ony úsh aıdyń ishinde ózbek tiline tárjimalap, baspaǵa tapsyrdym. Shyǵarmada kóptegen taǵdyrlar men halyqtyń basynan ótkergen qıly kezeńi sýrettelgen, - dedi Nazarbek Rahım.
Týyndynyń tanystyrylymyna jınalǵan zııaly qaýym ókilderi túpnusqanyń avtory, shoqaıtanýshy ǵalym Ábdýaqap Qaranyń eńbegin erekshe atap ótti. Ol kitapty jazýǵa uzaq jyldaryn arnaǵan. Eýropa arhıvterin aralap, saıası tulǵanyń júrip ótken jolyn, jazǵan eńbekterin jınaqtaǵan.
- Kitaptaǵy tańdamaly shyǵarmalardyń ishinen 40-qa jýyq maqala ózbek tiline aýdaryldy. Buryn bul derekterdi tek qazaq halqy ǵana biletin edi. Endi onyń eńbekterin túrki halyqtary da oqyp, tarıhı tulǵanyń ónegesimen tanysa alady, - dep málim etti tarıh ǵylymdarynyń kandıdaty Saǵat Taıman.
Eske salaıyq, byltyr Ózbekstandaǵy qazaq jazýshylarynyń birqatar kitaby jaryq kórgen bolatyn. Atap aıtqanda, Saparbek Imanbekovtiń «Dostarymyz jyrlaıdy», Abdýlla Rústemovtiń «Qaıran dúnıe» jáne jýrnalıst Rahıla Mansurovanyń 80 jas mereıtoıyna oraılastyrylǵan «Órleý» atty kitaby oqyrman nazaryna usynyldy.