Mustafa Óztúriktiń týǵan kúnine oraı velosherý ótedi
ASTANA. KAZINFORM – Belgili veloshabandoz Ernat Melsuly Rahmetolla 23 qarasha senbi kúni Astana qalasynda velosherý ótkizedi, dep habarlaıdy túrkııalyq «TRT» aqparattyq portaly.
Atalǵan BAQ-tyń dereginshe, Qazaqstan Taekvondo federatsııasynyń negizin qalaýshy, taekvondodan qara belbeý 6-dan ıegeri, halyqaralyq dárejedegi jattyqtyrýshy Mustafa Óztúriktiń týǵan kúnine oraı uıymdastyrylǵan sherý «Baıterek» eskertkishiniń aldynan bastalyp, sol jerde aıaqtalady.
Aty ańyzǵa aınalǵan dara tulǵa Mustafa Kábenuly Óztúrikti eske alý, rýhyna taǵzym etý, ónegeli ómiri men eńbegin dáripteýge úles qosý maqsatynda uıymdastyrylǵan velosherý sonymen birge qazaq pen túrikke ortaq ul arqyly Qazaqstan men Túrkııanyń baýyrlastyǵyn, dostyǵyn nasıhattaıdy.
Jastardy otansúıgishtikke, el úshin eren eńbek etýge, qaısar bolýǵa úndep júrgen velosporttan Qazaqstannyń 3 dúrkin rekordshysy, jýrnalıst Ernat Rahmetolla osy jobasyn Astananyń qıyn aýa sharttarynda jalǵyz ózi atqaryp shyǵýǵa bel býyp otyr.
«2022 jyly 55 kúnde 5555 shaqyrym júrip, Ahmet Baıtursynulynyń týǵanyna 150 jyl mereıtoıyna arnap Torǵaı, Aqkól, Sarytúbekten bastap, Qostanaı, Aqtóbe, Atyraý, Mańǵystaý oblystary jáne Grýzııa, Túrkııa aýmaǵy arqyly Stambýldyń Gúneshli aýdanyndaǵy Mustafa Óztúrik jerlengen zırat basynda sherýin aıaqtaǵan Ernatpen Ankara jurtshylyǵy da tanys», - dep jazady túrkııalyq BAQ.
Aıta keteıik, Ernat Rahmetolla buǵan deıin respýblıkalyq jáne halyqaralyq deńgeıde 14 velosherý ótkizgen.
