«Mustafa Óztúrik júldesi»: Taekvondo úzdikteri Astanada anyqtalady

ASTANA. KAZINFORM – Astana qalasynda 2025 jyldyń 1 aqpany kúni Astanadaǵy Rixos qonaqúıiniń «Jeruıyq» zalynda «Qazaqstan WT taekvondo federatsııasynyń» uıymdastyrýymen «Mustafa Óztúrik júldesi» saltanatty is-sharasy ótedi.

Saltanatty is-sharaǵa QR Týrızm jáne sport mınıstri, QR Ulttyq Olımpıada komıtetiniń, QR Ulttyq Paralımpıadalyq komıtetiniń jetekshileri, memlekettik organ ókilderi, sondaı-aq, sportshylar, bapkerler, tóreshiler men taekvondo jáne para taekvondo ardagerleri qatysady.

Іs-shara aıasynda jyl qorytyndylanyp, 2024 jyly iri jetistikterge jetken ári atalǵan sport túriniń damýyna zor úles qosqan sportshylar, bapkerler jáne tóreshiler marapattalady.

«Mustafa Óztúrik júldesi» – qazaqstandyq taekvondo sportynyń jetistigin asyryp, osy sport túriniń elimizde keń taralýyna úles qosqan uly tulǵany este saqtaý maqsatynda ótkiziletin jyl saıynǵy júldege aınalmaq.

«Qazaqstan WT taekvondo federatsııasy» atalǵan is-sharanyń dástúrge aınalyp, taekvondonyń Qazaqstandaǵy damýyna tikeleı áser etetin jáne osy sport túriniń qundylyqtaryn arttyratyn joba bolaryna senim bildiredi.

Esterińizge sala keteıik, osyǵan deıin Astanada Qazaqstandyq taekvondo (WT) federatsııasy músheleriniń kezekten tys jınalysy ótip, federatsııanyń jańa prezıdenti saılanǵanyn jazǵan bolatynbyz.