Mustafa Óztúrik meni Qazaqstanda karate mektebin ashýǵa shaqyrǵan edi — sportshynyń Germanııadaǵy dosy

ASTANA. KAZINFORM — Qazaq taekvondosynyń negizin qalaýshy, taekvondodan qara belbeý 6 dan ıegeri, halyqaralyq dárejedegi jattyqtyrýshy Mustafa Óztúrik tiri bolǵanda bıl 70 jasqa tolar edi. Germanııanyń Keln qalasynda turatyn Mustafa Óztúriktiń syrlas dosy Ǵanı Makın sportshyny saǵynyshpen eske alyp, Kazinform tilshisine óz estelikterimen bólisti.

«Mustafa sheteldegi qazaqtardyń jaryq juldyzy edi. Men Mustafa men birge óstim. Ol taekvondo men karate óneri boıynsha jattyqtym. Ekemiz jaqyn dos boldyq. Mustafa syrtta júrip, ákesiniń qaıtys bolǵanyn kóre almaı qalǵan edi. Áli esimde bir kúni keshte ekemiz áńgimelesip otyrdyq. Ol maǵan ákesin aıtyp, kózine jas alyp óziniń jazǵan óleńin kórsetti. Men onyń júregin jaryp shyqqan sózderin dombyraǵa salyp, áýen jazdym. Bul án keıin «Juldyzdardy tileısiń be» degen atpen el arasyna tarady. Ákege degen úlken tebirenisten týǵan án bul kúnde el júreginde», - deıdi ol.

Sonymen birge sportshynyń dosy ózin qazaq eline shaqyryp, «birge jumys jasaıyq», degen Mustafanyń usynysyn ýaqytynda qabyldap kele almaǵanyna ókinetindigin jetkizdi.

«Ol Qazaqstanda taekvondo mektebin ashty. Sol kezde maǵan habarlasyp, qazaq eline kelip karate mektebin ashsań dep ótinish aıtty. Men otbasylyq jaǵdaıymmen bara almaıtynymdy aıtqan edim, maǵan ókpeledi. 6 aı boıy sóılespeı qoıǵan edi. Keıin qurban aıt kezinde Túrkııaǵa kelip, osynda jolyqtyq dastarhan basynda áńgimelestik. Men Qazaqstanǵa baryp, karete mektebin quratyn boldym. Ol kisi Qazaqstanǵa ushyp ketti. Mende qujattarymdy jınap kóshýge rettelip jatqanmyn. Bir aptadan keıin Mustafanyń Almatyda qaza tapqany týraly qaraly habar aldyq. Júregim qan jylady, meniń Qazaqstanǵa kelý josparymda sol kúni toqtady», - deıdi Ǵanı Makın.