Mustafa Óztúriktiń rýhyna arnap kompozıtor Sholpan Qorǵanbek kúı shyǵardy
NUR-SULTAN. QazAqparat – Belgili kompozıtor Sholpan Qorǵanbek sport qaıratkeri Mustafa Óztúriktiń rýhyna arnap «Tarlan» atty týyndy shyǵardy, dep habarlaıdy QazAqparat tilshisi elordadaǵy Memlekettik akademııalyq fılarmonııanyń baspasóz qyzmetine silteme jasap.
Qazaqstannyń belgili sport qaıratkeri Mustafa Óztúrik kózi tiri bolsa, 23 qarashada 60 jasqa tolar edi. Aty ańyzǵa aınalǵan tulǵa óz ómirinde Qazaqstanda taekvando mektebiniń negizin qalap, adal izbasarlaryn tárbıeledi. Rýhy myqty, óz ıdeıalaryna berilgen Mustafa Óztúriktiń beınesi kompozıtor Sholpan Qorǵanbekti «Tarlan» aspaptyq týyndysyn shyǵarýǵa shabyttandyrǵan.
Dombyra únindegi lırıkalyq bastama keıipkerdiń týǵan jeri týraly, óziniń barlyq bilimi men daǵdylaryn týǵan halqyna qalaı jetkizýge bolatyndyǵy týraly oılaryn jetkizedi. Búkil ansamblmen oryndalatyn shyǵarmanyń qarqyndy bólimi M. Óztúriktiń erik-jiger, rýh kúshi, batyldyq, adaldyq sııaqty qasıetterin asha otyryp, jigerli, ekpindi shyrqalady.
«Qazaqstannyń aty ańyzǵa aınalǵan tulǵalary, erekshe tulǵalar meni jigerlendirgendeı boldy, olar bizdiń qýatty jáne baı shejiremizdi quraıtyn tulǵalar dep aıtýǵa bolady. Osylaısha Ál-Farabıdiń, Abaıdyń, Sultan Beıbarystyń, Shyńǵyshannyń, Bórte, Keıki batyrdyń, Baýyrjan Momyshulynyń, Bekzat Sattarhanovtyń mýzykalyq portretteri dúnıege keldi, Mustafa Óztúriktiń tulǵasy da meni mýzykalyq arnaý jazýǵa shabyttandyrdy. Maǵan ózim bastan keshirgen sezimdi, myqty adamnyń ómir beınesi men qyzmetine degen qyzyǵýshylyqty dúıim jurtqa jetkizgim keldi. Bul maqtanysh pen tańdaný sezimi. Árqashan mýzyka quraly retinde keıipkerdiń adamı qasıetterin, onyń bastan keshkenderin, oılary men kúshti rýhyn jetkizgim keledi. Tyńdaýshy meniń mýzykalyq shyǵarmamdy rızashylyqpen qabyldaıdy degen senimdemin», - dedi shyǵarmanyń avtory Sholpan Qorǵanbek.
