Mustafa Óztúrik jaıly derekti fılm jaryqqa shyqty - VIDEO
ASTANA. QazAqparat - Qazaq topyraǵyna taekvondo sportyn ala kelgen, alty alashtyń aıbynyna aınalǵan aıboz uly Mustafa Óztúrik týraly «Alashtyń aıboz uly» atty derekti fılm túsirilip, jurtshylyqqa usynyldy. «KTK» arnasy tapsyrysy negizinde dúnıege kelgen týyndy Ystambul (Túrkııa), Mıýnhen (Germanııa) jáne Almaty qalalarynda túsirilgen, dep jazady baistars.kz.
Elin álemge tanytqan azamat Mustafa Óztúrik kózi tirisinde-aq óz halqynyń nar tulǵasy ekenin dáleldep ketti. Qazaq eline kelip, taekvondo sportynan balalar men jastarǵa mektepter ashyp, elimizdiń osy sport túrinen federatsııasynyń negizin qalady. Búginde elimizde áıgili sportshynyń shákirtteriniń ózi shákirt tárbıelep, dúnıejúzilik masshtabta jetistikterge jetip júr.
Qazaqstanda Taekvondo federatsııasynyń negizin qalaýshy, sporttyń saıypqyran sańylaǵy Mustafa Óztúrik bıyl kózi tiri bolǵanda 60 jasqa tolar edi. Ókinishke oraı, dańqty tulǵaǵa 23 qarasha kúni mereıtoıyn halqynyń ortasynda toılaý baqyty buıyrmaǵan eken. Búgin dańqty tulǵanyń ómir jolyna arnalǵan «Alashtyń aıboz uly» atty derekti fılm jaryqqa shyqty. Joba avtory - Arman Shoraev bolsa, rejısseri - Murat Belgibaev.
