Músirepov teatry men Qurmanǵazy orkestri buryn-sońdy bolmaǵan joba usynady
NUR-SULTAN. QazAqparat - 29 naýryzda Ǵ.Músirepov atyndaǵy Qazaq memlekettik akademııalyq balalar men jasóspirimder teatry men Qurmanǵazy atyndaǵy Qazaq memlekettik akademııalyq halyq aspaptary orkestri jańa kontsert-spektakldi kórermen nazaryna usynady, dep habarlaıdy QazAqparat tilshisi.
«Elbasynyń «Uly dalanyń jeti qyry» maqalasyna sáıkes, babalarymyzdyń amanatyn jastarǵa jetkizý maqsatynda, «Amanat» atty kontsert-spektakldi usynamyz. Orkestr men teatr akterlarynyń birigip kontsert-spektakl oınaýy Qazaqstanda buryn bolmaǵan. Osylaısha, kórermenderge akterlardyń da án aıtyp, bı bılep, orkestrmen birge poezııa-monolog oqıtynyn, sol birlesken jobany joǵary deńgeıde jetkizýge bolatynyn kórsetkimiz keledi», - dedi Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń dırektory Azamat Satybaldy Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, joba sátti júzege assa, shyǵarmashylyq top Nur-Sultan qalasyna gastrolmen keledi.
«Amanat» kontsert-spektakliniń basty maqsaty - ulylarymyzdy ulyqtaý. Onda poezııa, án men kúı, bári bolady. Jobada Qorqyt babamyzdan bastap, búgingi jas aqyn-kompozıtorlarǵa deıin barlyq uly tulǵalardy kórsetý kózdelip otyr. Bul joba Qazaqstanda tuńǵysh ret qolǵa alyndy», - dedi Qurmanǵazy atyndaǵy Qazaq memlekettik akademııalyq halyq aspaptary orkestriniń dırektory Nurǵısa Dáýeshev.
Aıta keteıik, 27 naýryzda Halyqaralyq teatr kúni atalyp ótedi. Bul kúni elimizdiń barlyq teatrynda merekelik sharalar uıymdastyrylady.
