Músinge aıyppul salyndy
ASTANA. QazAqparat - Germanııadaǵy Karlsrýe qalasynda maıysqan Mercedes-Benz avtomobıli túrindegi músinge turaqqa qoıý erejelerin buzǵany úshin aıyppul salyndy.
Bul týraly Twitter áleýmettik jelisindegi jeke paraqshasynda paıdalanýshy Sham Jaff jazdy.
Aıyppul sýretshi Ervın Výrmnyń jasaǵan músinine salynǵan. Túbirtekte qandaı soma jazylǵany jáne bir bóligi artyndaǵy qurylystyń qabyrǵasynda turǵan kólik úshin aıyppuldy kim tóleıtini ázirge belgisiz bolyp otyr.
Ervın Výrm óz shyǵarmashylyǵynda avtomobıldermen talaı ret jumys istegen. Mysaly, ol maıystyrylǵan Volkswagen mınıvenin qurastyrǵan jáne «semiz» kólikter toptamasynyń avtory bolyp tabylady.
