Mýsın: Aldaǵy 7 jylda memqyzmetterdiń 90% proaktıvti negizde kórsetiledi

ASTANA. QazAqparat – Aldaǵy 7 jylda memlekettik qyzmetterdiń 90 paıyzy proaktıvti negizde kórsetiledi. QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Astanada ótip jatqan Strategııalyq bastamalar forýmynda osyndaı josparyn ortaǵa saldy, dep habarlaıdy QazAqparat tilshisi.

«Keleshektegi tsıfrlyq Qazaqstannyń beınesi týraly aıtsaq, eń bastysy – adamǵa baǵdarlaný. Bul – tsıfrlyq tehnologııalardyń ómirdiń túrli jaǵdaılaryna qaraı kóshýi. Bizdiń tsıfrlyq úkimet retindegi mindetimiz –búkil Úkimet adamǵa qaraı bet buryp, áldeqaıda proaktıvti bolýy kerek. ıAǵnı, qarapaıym adam smartfon arqyly negizgi suraqtarǵa «Iá», «Joq», «Bilmeımin» degen sııaqty jaýap berip-aq, qajetti servısterge qol jetkize alýy kerek», - dedi vedomstvo basshysy.

Onyń aıtýynsha, tsıfrlyq tehnologııalar qazaqstandyqtardyń ómirine neǵurlym kóbirek ense, Úkimet qabyldaıtyn sheshimderdiń tıimdiligi soǵurlym artpaq.

«Qazir memlekettiń qyzmeti tsıfrlandyrylǵan bolsa, jeti jyldan keıin 90 paıyz qyzmet proaktıvti bolýy shart. Ol búkil jerde, kez kelgen adamǵa qoljetimdi bolady.

Sonda memleket sheshimdi qandaıda bir gıpotezalar men paıymdar negizinde emes, memlekettik jáne memlekettik emes derekter bazasy arqyly jınaqtaǵan málimetteri negizinde shyǵarady»,-dedi mınıstr.