«Musylman baýyrlar» uıymy Frantsııada qaýipti dep tanyldy

ASTANA.KAZINFORM — Sársenbi kúni Elıseı saraıynda Qaýipsizdik keńesiniń kezekten tys otyrysy ótip, onda Frantsııa prezıdenti E.Makronǵa «Musylman baýyrlar» qozǵalysynyń (Qazaqstanda tyıym salynǵan uıym) qyzmeti týraly esep usynyldy, dep habarlaıdy Kazinform tilshisi.  

Frantsııa prezıdenti Emmanýel Makron Qorǵanys jáne ulttyq qaýipsizdik keńesiniń otyrysyn «respýblıkalyq ınstıtýttarǵa ıslamshyl uıymdardyń „áserine“ qarsy turýǵa» shaqyrdy. Bul týraly Frantsııanyń halyqaralyq radıosy habarlady.

Frantsýz sheneýnikteri ulttyq birlikke qaýip tóndiretin «Musylman baýyrlar» qozǵalysynyń (Qazaqstanda tyıym salynǵan uıym) qyzmetine nazar aýdardy. Óz kezeginde tirkelgen uıym taǵylǵan aıyptardy joqqa shyǵaryp, úkimet áreketin «ıslamofobııa» dep aıyptady.

Frantsýz Qaýipsizdik Keńesiniń otyrysy E.Makronnyń 2017 jyly terrorızmmen jáne radıkaldy ıslammen kúresý onyń prezıdenttiginiń basym baǵyttarynyń biri bolyp jarııalanǵan kezde bastalǵan saıasatynyń jalǵasy boldy, dep basa aıtty Elıseı saraıy.

— Prezıdent Makron 2017 jyly qyzmetine kirisken kezde qoǵamdyq pikirde eki taqyryp basym boldy: jumyssyzdyq jáne terrorızm, — dep eske aldy Elıseı saraıyndaǵy RFI derekkózi.

E.Makronnyń prezıdent retindegi alǵashqy qadamdarynyń biri tótenshe jaǵdaı rejımin uzartý, sodan keıin Іshki qaýipsizdik jáne terrorızmge qarsy zań (SILT) qabyldaý boldy. Bul sharalar bıýdjetti kóbeıtýmen jáne barlaý qyzmetterin kúsheıtýmen qatar júrdi.

Qaýipsizdik keńesine daıyndyq barysynda «Musylman baýyrlar» uıymyna qatysty zertteýlerge jaýaptylar 200-den astam suhbat júrgizip, Frantsııanyń 10 departamenti men 4 eldiń bólimderinde boldy», — dep atap ótti derekkóz.

«Musylman baýyrlar» qozǵalysy Frantsııa aýmaǵyna enýde belsendi qarqyn kórsetip otyr, dep habarlady prezıdent ákimshiliginiń ókili. Onyń aıtýynsha, oqshaýlaný men anklavtar qurýdy kózdeıtin separatızmnen aıyrmashylyǵy, «Musylman baýyrlar» qozǵalysynyń strategııasy memlekettik qurylymdarǵa enýge baǵyttalǵan: «Kerisinshe, bul ózderin oqshaýlandyrmaı, bılikti, atap aıtqanda, mýnıtsıpalıtetterdi jaýlap alý úshin jasyryný qısynynyń kórinisi.

— Olarlyń túpkilikti maqsaty — búkil frantsýz qoǵamyn sharıǵatqa kóshirý, — dedi Frantsııanyń ishki ister mınıstri Brýno Retaılo, — bul qabyldanbaıdy, óıtkeni bul Frantsııa Respýblıkasynyń qaǵıdattary men ulttyq birlik maqsattarymen múldem sáıkes kelmeıdi.

Eske sala keteıik, buǵan deıin Qazaqstan men Frantsııa arasyndaǵy adamdardy readmıssııalaý týraly qujat qaralǵanyn jazǵan edik.