Murynǵa sebiletin koronavırýs vaktsınasy 2022 jyly tirkelýi múmkin
MÁSKEÝ. TASS-QazAqparat – Reseıdiń Gamaleıa atyndaǵy ortalyǵynyń ǵalymdary ázirlegen koronavırýsqa qarsy murynǵa sebiletin vaktsına 2021 jyldyń sońynda – 2022 jyldyń basynda klınıkalyq zertteýge shyǵarylady. Preparat 2022 jyly tirkelýi múmkin. Bul týraly ortalyq dırektory Aleksandr Gıntsbýrg málim etti, dep habarlaıdy QazAqparat TASS agenttigine silteme jasap.
«Ortalyq COVID-19-ǵa qarsy vaktsınany jasaý jáne jetildirý boıynsha birneshe baǵytta jumys júrgizip jatyr. Bir baǵyty – nazaldy vaktsına jasaý. Qazir onyń klınıkaǵa deıingi zertteýi júrgizilip jatyr. Klınıkaǵa osy jyldyń sońynda - kelesi jyldyń basynda engizýdi, 2022 jyly zertteý nátıjeleri boıynsha tirkeýden ótkizýdi josparlap otyrmyz», - dedi ǵalym.
Gıntsbýrgtiń aıtýynsha, ázirge nazaldy vaktsına eki márte jasaldy dep boljanǵan, biraq bir rettik bolýy da yqtımal. Onyń aıtýynsha, vaktsınanyń bul túriniń artyqshylyǵy – janama áseri is júzinde bolmaıdy.
Eske sala keteıik, Qazaq ulttyq agrarlyq zertteý ýnıversıteti janyndaǵy Halyqaralyq vaktsınologııa ortalyǵynyń ǵalymdary ózderi ázirlegen COVID-19-ǵa qarsy eki vaktsınany synaqtan ótkizý kezeńi aıaqtalýǵa jaqyn ekenin málimdegen bolatyn. Sonyń biri – NARUVAX-C19/Nano – murynǵa tamyzý arqyly beriletin vaktsına.
Buǵan deıin habarlanǵandaı, Qytaı ǵalymdary murynǵa arnalǵan spreı túrinde koronavırýsqa qarsy vaktsınaǵa klınıkalyq zertteýler júrgizip jatyr.
