Murt ósirgish krem jaqqan fýtbolshy 15 matchtan shettetildi
ASTANA. QazAqparat - Ońtústik Koreıa fýtbol quramasynyń oıynshysy aldaǵy 15 matchqa qatyspaıtyn boldy. Sebebi ol dopıng paıdalanǵan. Biraq sportshy bul zattyń onyń aǵzasyna ózi paıdalanǵan murtqa arnalǵan kremmen túsýi múmkin ekenin alǵa tartýda.
Osy rette eldegi Dopıngke qarsy komıtet ókili bylaı málimdedi: «Biz fýtbolshy Kan Sý Il kremdi sporttyq kórsetkishterin jaqsartý úshin paıdalandy deýden aýlaqpyz. Mundaı jaǵdaılar qaıtalanbas úshin komanda basshylyǵy oıynshylardy dopıng paıdalanýdan saqtandyrýlary tıis».
Al aǵzasynan metıltestosteron anabolıkalyq steroıdy tabylyp, dıskvalıfıkatsııalanǵan 27 jastaǵy forvard keleńsiz jáıt úshin jankúıerlerden keshirim surady, dep habarlaıdy 24.kz rbc.ru-ǵa siltememen.
Kan Sý Il Mıanma quramasymen ótetin 2018 jylǵy álem chempıonatynyń irikteý oıynyna qatysý úshin shaqyrylǵan edi.
