Mýrka - qylmys áleminiń kóshbasshysy bolǵan
ASTANA. QazAqparat - «KTK» telearnasynan kórsetilgen derekti fılmde kýágerler (Muhametqalı Ospanov, Ermek Shaıahmetov, Baımurat Saqtaǵanov, Sergeı Nepropekın) Murathan Toqmadıdyń alaıaqtyq jasaý, adamdarǵa qoqan-loqy kórsetý, rekettik, reıderlik jolmen basqa bireýlerdiń bıznesin tartyp alyp, baıyǵany týraly jasyrmaı aıtty.
Mysaly, M.Toqmadıdyń kúzetshilerin daıyndaǵan Muhametqalı Ospanov bir kúnde eki-úsh jerge «razborkaǵa» baratyndaryn áńgimeledi. Ol keıinirek Murathanmen at quıryǵyn úzgenine shúkirlik etedi.
Ermek Shaıahmetov - qarapaıym júrgizýshi. 8 jylǵa jazyqsyz sottalyp, túrmege otyryp shyqqan Ermek ózin sottaǵandarǵa Murathannyń tapsyrys bergenin ashyq aıtty. Al alyp bazanyń burynǵy qojaıyny Baımurat Saqtaǵanovqa M.Toqmadı: «Eger ózińniń, otbasyńnyń amandyǵyn oılasań, qujatqa tez qolyńdy qoı!» dep qoqan-loqy jasaǵan. B.Saqtaǵanov bazasyn qoryqqanynan Murathanǵa berýge májbúr bolady. M.Toqmadı bul jerden «QazStroıSteklo» atty elimizdegi úlken shyny shyǵaratyn zaýyt ashady.
Alaıda, bul zaýytqa Murathannyń dosy - Sergeı Nepropekın 1 mln. AQSh dollarynan astam qarjysyn salady. Zaýyt aıaǵynan tik turǵan soń, ol bar úlesinen qaǵylyp, jer sıpap qalady.
Murathan Toqmadıdyń týystary bar shyndyqty jaıyp saldy
Atap aıtqanda, Murathannyń jıeni - Beken Imanqalıev óz týys aǵasynyń qylmys álemimen baılanystary týraly ashyq aıtty. Ol Murathannyń «Rahat», «ıAlıan» bazarynda bılik júrgizip, saýdagerlerden «alym» jınaǵanyn jasyrmady. Kezinde Murathan Toqmadı qytaı azamatyn da «eseptegishke» otyrǵyzýǵa áreket jasaıdy. Tek dıplomatııalyq kúshterdiń aralasýy nátıjesinde janjal ýshyqqan joq. Óziniń týys aǵasy orǵa ıtergen soń, Beken Imanqalıev bar shyndyqty jaıyp saldy.
Derekti fılmde kórsetilgen aýladan tabylǵan tapanshany Beken Murathannyń tapsyrmasy boıynsha jasyrǵan. Alaıda Murathan qamaýǵa alynǵannan keıin bar kináni óziniń jıenine arta salǵan.
Atap aıtarlyǵy, Murathannyń áıeli - Jámıla Aıymbetova-Toqmadı kúıeýi ustalǵan soń shetelge qashyp, áleýmettik jeliler arqyly: «Meniń kúıeýime jazyqsyz jala jabyldy. Ýaqytsha abaqtyda qysym kórsetip jatyr» dep shýlatpaq bolǵany belgili. Alaıda Murathanmen apta saıyn kezdesip, hal-jaǵdaıyn bilip júrgen apasy - Úmit Toqmadı Jámılanyń ótirik «aıqaıyn» áshkerelep berdi.
Úmit Toqmadı bylaı dedi: «Murathanǵa eshqandaı qysym jasalǵan joq. Onymen apta saıyn kezdesemiz. Barlyq is-sharalar zań sheńberinde ótip jatyr. Murathannyń qaly jaman emes». Al óziniń qylmysy úshin ókinip, bar kinásin moınyna alǵan Murathannyń ózi: «Meniń áıelimdi bireýler ádeıi adastyryp otyr» dep málimdedi.
Murathan Toqmadı tolyqtaı óz kinásin moıyndady
Murathan Toqmadımen bir kamerada otyrǵan adamdar (Dáýlet pen Sergeı) oǵan eshqandaı qysym jasalmaǵanyn, psıhotroptyq zattarmen ýlanbaǵanyn áńgimelep berdi. Eń bastysy, Murathannyń ózi barlyq kinásin, qylmysyn tolyqtaı moıyndady. Ol tergeý organdarymen mámilege kelip, sotta protsessýaldyq kelisim jasaýǵa ózi ótinish aıtty. Uıymdasqan qylmystyq toptyń jetekshisiniń osydan 13 jyl burynǵy qandy qylmysqa qatystylyǵy áli tergelýde. Sonymen qatar, M.Toqmadıdyń qashqyn bankır Muhtar Áblıazovpen qarym-qatynasy da tergeý tolyq aıaqtalǵan soń belgili bolady.
