"Murajaılardaǵy aılyq" jobasynyń birinshi kezeńiniń aıaqtalýyna arnalǵan saltanatty kesh ótedi
ALMATY. 19 qańtar. QazAqparat /Názıra Eleýhan/- Almatyda 25 qańtar kúni British Council keńsesinde "Murajaılardaǵy aılyq" jobasynyń birinshi kezeńiniń aıaqtalýyna arnalǵan saltanatty kesh ótedi. Sharada joba qorytyndylary men ári qaraıǵy júzege asyrylatyn josparlar tanystyrylady.
Keshke jobaǵa qatysýshy murajaı qyzmetkerleri, bilim berý mekemeleriniń, halyqaralyq uıymdardyń ókilderi qatysady.
Esterińizge sala ketsek, joba 2010 jyldyń mamyr aıynda bastalǵan bolatyn. Onyń basty maqsaty - murajaı úshin jolserikter men kitapshalardy aǵylshyn tiline aýdarý bolyp tabylady. Jobanyń birinshi kezeńine 18 murajaı qatysqan. Endi jobaǵa qatysýshylardyń barlyǵy British Council qarjylandyrýymen halyqaralyq standarttarǵa saı, aǵylshyn tilinde basylyp shyqqan jolserikter men kitapshalardyń tegin 1000 danasyna ıe bolady. Sonymen qatar joba qorytyndysynda Qazaqstan murajaılaryna da halyqaralyq standarttarǵa saı jasalǵan kitapshalar jáne olardyń elektrondyq nusqasy tabystalatyn bolady.
Jobany iske asyrý barysynda oryssha úırenip júrgen brıtandyq stýdentter jáne aǵylshynsha úırenip júrgen qazaqstandyq stýdentter Qazaqstan murajaılarynda tájirıbeden ótti. Onda olar murajaı kýratory jetekshiligimen murajaı kórermenderi úshin eksponattar kestelerin orysshadan aǵylshyn tiline aýdarýmen aınalysty.
Atalmysh sharanyń uıymdastyrýshylary British Council halyqaralyq uıymy, «Bul joba Qazaqstannyń baı mádenıeti men tarıhı murasyn nasıhattaýǵa, sondaı-aq, alǵa jyljýyna yqpal etpek, al joba aıasynda jasalynǵan jolserikter men kitapshalar Azıada kezinde aǵylshyn tildi qonaqtar úshin tabylmas kómek bolmaq»,- deıdi.
