Murajaı, muraǵat jáne kúısandyq sózderi termınologııa komıssııasynda bekitilmegen
«Keıingi kezderi mýzeı, arhıv sózderi jaıly ekiudaı pikir aıtylyp júr. Termınologııa komıssııasynda murajaı nemese muraǵat nemese kúısandyq sózderi bekitilgen emes. Ol sózder pıanıno, fortepıano, mýzeı jáne arhıv kúıinde qalǵan edi. Biraq bizdiń áriptesterimiz, jýrnalıster bul sózderdi óz yńǵaıyna qaraı qoldanady. Oǵan esh qarsylyǵymyz da joq, aýyzeki tilde qoldana bersin. Biraq, negizgi bekitilgen termınder - pıanıno, fortepıano, mýzeı jáne arhıv», - dedi Ǵalymjan Sársenbaıuly termınjasam baǵyttary týraly Astanada ótken semınar-keńeste.
Sonymen birge, Ǵalymjan Meldeshov termınologııaǵa qatysty sińispeı júrgen sózder týraly áńgimeledi.
«Jýrnalısterden «áýit», «qursym» sózderiniń maǵynasyn bilesizder me dep suraǵym keledi. Nemese «jelkóz»? Bul sózder termınologııa komıtetinde, termınologııa komıssııasynda bekitilgen, biraq halyq arasynda qoldanylmaıdy. Jasyratyny joq, osy turǵyda óz áriptesterimiz ben ǵalymdar tarapynan birqatar syn aıtylýda. Sondyqtan, búgingi semınarda ǵalymdarmen, termınologtarmen termınjasamnyń negizgi baǵyttaryn aıqyndap, qoldanystaǵy sózderge múmkindiginshe sińisti sózderdi engizý máselelerin talqylaımyz», - dedi ol.
Komıtet ókili termınologııanyń bir ǵana salamen shektelmeıtinin, ár sala óz termınderin usynatynyn atap ótti.
«Ulttyq ekonomıka mınıstrligi, ulttyq kompanııalar, medıtsına, ǵylym, tehnıka salasynyń ókilderi ózderine yńǵaıly termınderdi usynady. Al termınologııalyq komıssııa músheleri múmkindiginshe sol sala mamandarynyń yńǵaıyna keletin sózderdi iriktep alyp, qoldanysqa engizýge tyrysady».
Aıta keteıik, búgin Astanadaǵy QR Ulttyq akademııalyq kitaphanasynda «Qazirgi termınjasamnyń baǵyttaryn aıqyndaý máseleleri» taqyrybynda respýblıkalyq semınar-keńes ótti. Oǵan QR Úkimeti janyndaǵy Respýblıkalyq termınologııa komıssııasynyń músheleri, termınolog-ǵalymdar, QR mınıstrlikteriniń til salasyna jaýapty qyzmetkerleri qatysty.
