Murathan Toqmádıdiń isi boıynsha jaryssóz 12 naýryzda bastalady
TARAZ. QazAqparat - Tarazda bankır Erjan Tátishevti óltirdi dep aıyptalyp otyrǵan bıznesmen ári «Depýtattyq korpýs» uıymdasqan qylmystyq tobynyń serkesi Murathan Toqmádıge qatysty qylmystyq is boıynsha basty sot otyrysy bir aptaǵa toqtatyldy, dep habarlaıdy QazAqparat tilshisi.
Tarazdaǵy sot protsesi Jambyl oblystyq qylmystyq ister jónindegi mamandandyrylǵan aýdanaralyq sotynda ótip jatyr, oǵan 130 kýáger qatysýda, sonyń 73-inen jaýap alynyp, 57-siniń túsiniktemesi jarııalandy. Sottalýshy birinshi otyrysta óz aıybyn moıyndaǵan bolatyn.
Memlekettik aıyptaýshy Іlııas Esqalıev osyǵan deıingi 11 sot otyrysynda tergeý turaqty, kútpegen oqıǵalarsyz ótken, kýágerler óz túsiniktemelerin rastaǵan.
«Bul Bas prokýratýranyń prokýrory Bekejan Ermuhanbektuly bastaǵan tergeý toby júrgizgen sot tergeýiniń sapasy joǵary ekenin kórsetedi», - deıdi Іlııas Esqalıev.
Kýágerlerdiń túsiniktemelerinen sottalýshy M. Toqmádı men óltirilgen bankır E. Tátishev, UQK-nyń burynǵy basshysy N. Dútbaev jáne óltirýge tapsyrys bergen qashqyn olıgarh M. Áblıazov arasyndaǵy qatynastardyń jalpy kartınasy belgili bola bastady. Memlekettik aıyptaýdyń ókili sot talqylaýy barysynda aty atalǵan jáne E. Tátishevtiń ólimine qatysy bar tulǵalarǵa qatysty materıaldar jeke qylmystyq iske jiktelip, tergeý júrgiziletinin jetkizdi.
E. Tátishevtiń ólimi boıynsha M. Toqmádıge qatysty qylmystyq is 79 tomnan turady. Protseske sýdıa Azamat Tilepov tóraǵalyq etýde.
Eske sala keteıik, 2017 jyldyń qazanynda shyqqan suhbatynda sottalýshy M. Toqmádı bankır Erjan Tátishevti 2004 jyldyń 19 jeltoqsanynda Jambyl oblysy Qordaı aýdany Otar stansasy mańynda ańshylyqqa shyqqan kezde atyp óltirgenin moıyndaǵan. Budan bólek, jemqorlyq jasaǵanyn - QR ІІM Tergeý-jedel tobynyń basshysy Erjan Artyqbaevqa aqshalaı syıaqy bergenin de moınyna alǵan. Endi M.Toqmádıge 1997 jylǵy redaktsııadaǵy QR QK 96-baby 2-bólimi «j», «z» tarmaqtarynda (adamdar toby, aldyn ala sóz baılasý arqyly adamdar toby jasaǵan, paıda tabý maqsatymen, sol sııaqty jaldanyp ne qaraqshylyqpen, bopsalaýmen ne bandıtızmmen adam óltirý) qarastyrylǵan qylmystar jasady degen aıyp taǵylýda.
