Murathan Toqmádıdiń isi boıynsha 130 kýágerdiń 30-nan jaýap alyndy
TARAZ. QazAqparat - Jambyl oblysynyń qylmystyq ister jónindegi mamandandyrylǵan sotynda bıznesmen, «Depýtattyq korpýs» atty qylmystyq toptyń serkesi Murathan Toqmádıdiń isi boıynsha sot isi jalǵasýda, dep habarlaıdy «QazAqparat» HAA tilshisi.
«Protsess dúısenbi kúni, ıaǵnı 19 aqpanda bastaldy. Eki kúnniń ishinde 30-ǵa jýyq kýágerden jaýap alyndy, - dep habarlady agenttik tilshisine Bas prokýratýranyń aǵa prokýrory Іlııas Isqalıev. - Jalpy, 135 kýáger bar. Alaıda olardyń 75-i ǵana sotta sóıleıdi».
20 aqpan kúni ótken sot otyrysynyń sońynda sýdıa Azamat Tilepov sot ákimshiligine Toqmádıdiń isi boıynsha kýáger retinde ótip jatqan 25 azamattan sotqa kele almaıtyny týraly ótinish túskenin habardar etti.
«Sebepter ártúrli. Keıbireýiniń qolynda múgedek týysy bar. Ondaı adamdar muqtaj týysyn tastap kete almaıdy. Keıbireýi basqa qalaǵa shyǵyp ketip, úlgere almaıdy», - deıdi Azamat Tilepov.
Eske salaıyq, «Depýtattyq korpýs» qylmystyq tobynyń jetekshisi M.Toqmádı 2017 jyldyń qazanynda Almaty qalasy Almaly aýdandyq sotynyń úkimimen bopsalaýshylyq jasaǵany úshin jáne zańsyz qarý-jaraq saqtaǵany úshin sottalǵan edi. Sot ony úsh jylǵa bas bostandyǵynan aıyrǵan bolatyn.
Belgili bolǵandaı, 2017 jyldyń qazanynda shyqqan suhbatynda sottalýshy M. Toqmádı bankır Erjan Tátishevti 2004 jyldyń 19 jeltoqsanynda Jambyl oblysy Qordaı aýdany Otar stansasy mańynda ańshylyqqa shyqqan kezde atyp óltirgenin moıyndaǵan. Budan bólek, jemqorlyq jasaǵanyn - QR ІІM Tergeý-jedel tobynyń basshysy Erjan Artyqbaevqa aqshalaı syıaqy bergenin de moınyna alǵan. Endi M.Toqmádıge 1997 jylǵy redaktsııadaǵy QR QK 96-baby 2-bólimi «j», «z» tarmaqtarynda (adamdar toby, aldyn ala sóz baılasý arqyly adamdar toby jasaǵan, paıda tabý maqsatymen, sol sııaqty jaldanyp ne qaraqshylyqpen, qorqytyp alýshylyqpen ne bandıtızmmen adam óltirý) qarastyrylǵan qylmystar jasady degen aıyp taǵylýda.
Sot barysynda aıyptalýshy ózine taǵylǵan aıyptardyń bári negizdi ekenin aıtyp, Erjan Tátishevti óltirgendigin tolyqtaı moıyndaǵan bolatyn.
Avtor: Galına Skrıpnık
