Murathan Toqmádı shyqqan úkimge kelisetinin aıtty
ASTANA. QazAqparat - Murathan Toqmádıdiń isi boıynsha tórelik etken sýdıa Azamat Tilepov shyqqan úkimdi túsindirdi, dep habarlaıdy «QazAqparat» HAA tilshisi.
Eske sala keteıik, «KazStroıSteklo» JShS ıesi Murathan Toqmádıge «Turan Álem Banki» AQ burynǵy basshysy Erjan Tátishevti óltirdi degen aıyp taǵylǵan bolatyn. Oǵan tapsyrys berýshi retinde, «Turan Álem Banki» AQ basshysynyń ólimin $4 mln-ǵa baǵalaǵan qashqyn olıgarh Muhtar Áblıazovtiń esimi atalǵan. Buryn Toqmádı «abaısyzda óltirgeni» úshin bir jylǵa sottalyp, artynsha raqymshylyqpen túrmeden bosatylǵan. 2017 jyly M.Toqmádıge 1997 jylǵy redaktsııadaǵy QR QK 96-baby 2-bólimi «j», «z» tarmaqtarynda (adamdar toby, aldyn ala sóz baılasý arqyly adamdar toby jasaǵan, paıda tabý maqsatymen, sol sııaqty jaldanyp ne qaraqshylyqpen, bopsalaýmen ne bandıtızmmen adam óltirý) qarastyrylǵan qylmystar jasady degen aıyp taǵylyp, úsh jylǵa bas bostandyǵynan aıyrylǵan. Bas prokýratýra bankır Erjan Tátishevtiń ólimine qatysty jańa derekter boıynsha tekseris júrgizip, osy is boıynsha sot óndirisi qaıta júrgizilgen bolatyn.
Sotta prokýror Murathan Toqmádıdi 12 jylǵa sottaýdy suraǵan edi. Jambyl oblysy qylmystyq ister jónindegi mamandandyrylǵan aýdanaralyq soty bankır Erjan Tátishevtiń ólimine qatysty qylmystyq is boıynsha úkim shyǵardy. Oǵan sáıkes Murathan Toqmádı 10 jyl 6 aıǵa bas bostandyǵynan aıyryldy. Osy merzimge 2017 jyly Almaty qalasy Almaly aýdandyq soty shyǵarǵan úkimniń merzimi de kiredi. M. Toqmádı jazany qaýipsizdigi barynsha kúsheıtilgen mekemede óteıtin boldy.
Sotta tóraǵalyq etken sýdıa sottalýshydan «osy úkimge kelisesiz be» degen suraǵyna Toqmádı kelisetinin aıtyp jaýap berdi.
Sýdıa Azamat Tilepovtyń aıtýynsha, qazirgi qoldanystaǵy zańnama boıynsha aıyptalýshynyń kináni moıyndaǵany úshin ǵana úkim shyǵarylmaıdy.
«Sot protsessi barysynda sottalýshynyń, kýágerlerdiń, sarapshylardyń qatysýymen jaýap alý men tergeý amaldary kezindegi vıdeojazbalar kórsetilip, protsesstiń barlyq qatysýshylary tyńdaldy. 2004 jyly jasalǵan qylmystyń motıvi men jaǵdaılary boıynsha tolyq dálelder keltirildi. Kýágerlerdiń jaýaptary arqyly sottalýshy M.Toqmádı, óltirilgen bankır E.Tátishev, UQK-niń burynǵy basshysy N.Dútbaev pen óltirýge tapsyrys bergen M.Ábilázovtyń arasyndaǵy qarym-qatynastyń sulbasy jasaldy», - dedi ol.
Sottalýshynyń protsessýaldyq kelisimi men ony M.Toqmádıdiń tolyq oryndaýyna baılanysty zańnamalyq turǵyda jumsaqtyq kórsetý, Azamat Tilepovtyń aıtýynsha, «sot barysynda sottalýshy men kýágerlerden jaýap alý kezinde anyqtalǵan adam sottalǵan kezde ǵana oryndalady».
