Murathan Toqmadı óziniń qashqanyn qatelik dep atady
ASTANA. QazAqparat - QR UQK saıtynda jarııalanǵan vıdeoda Murathan Toqmadı óziniń aýrýhanadan qashý áreketin qatelikke balady.
«Men Murathan Toqmadı, jaǵdaıym jaqsy, densaýlyǵyma shaǵym aıtpaımyn. Ábilıazovtyń tapsyrysy boıynsha 2004 jyly Erjan Tátishevti óltirý faktisi boıynsha qylmystyq jaýapqa tartyldym. Sotta rastaǵanymdaı, óz kinámdi moıyndaımyn. 8 naýryzda qashyp ketkim keldi, alaıda quqyq qorǵaý organdarynyń qyzmetkerleri meni ustap, tergeý ızolıatoryna qamaldym. Óz kinámdi moıyndaımyn, bul qatelik boldy dep esepteımin», - dedi Toqmadı UQK-nyń saıtynda jarııalanǵan vıdeoda.
Málim bolǵandaı, 2018 jylǵy 8 naýryzda 19:20 shamasynda Ábilıazovtiń tapsyrysy boıynsha «Turan Álem Banki» AQ burynǵy basqarma tóraǵasy E.N. Tátishevti qasaqana óltirdi degen kúdikke ilingen Murathan Shakerhanuly Toqmadı (1966 jyly Shyǵys Qazaqstan oblysy Aıagóz qalasynda týǵan) Jambyl oblystyq aýrýhanasy mekemesinen qashý áreketin jasady.
«Sot protsesi kezinde qylmystyq ister boıynsha mamandandyrylǵan aýdanaralyq sotta M. Toqmadı densaýlyǵynyń nasharlyǵyna shaǵym aıtyp, osy oraıda ýaqytsha Jambyl oblystyq aýrýhanasynda bolǵan.
...M.Toqmadı Taraz qalasynda jedel ustalyp, Jambyl oblysy boıynsha QAJD JD-158/1 (Jambyl oblystyq ІІD Tergeý ızolıatory) mekemesine qamaldy» delingen habarlamada.
Qazirgi kezde M.Sh. Toqmadıdiń qashýyna yqpal etken jaǵdaılar men sebepter anyqtalýda.
Eske salaıyq, «QazQurylysShyny» JShS basshysy M. Toqmádı «Turan Álem Banki» AQ (qazirgi «BTA bank») Erjan Tátishevti 2004 jyldyń 19 jeltoqsanynda Jambyl oblysy Qordaı aýdany Otar stansasy mańynda ańshylyqqa shyqqan kezde atyp óltirgenin moıyndady. Onyń ólimine atalǵan baktiń burynǵy basshysy Muhtar Ábilıazov tapsyrys bergen.
Budan bólek, jemqorlyq jasaǵanyn - QR ІІM Tergeý-jedel tobynyń basshysy Erjan Artyqbaevqa aqshalaı syıaqy bergenin de moınyna alǵan. Endi M.Toqmádıge 1997 jylǵy redaktsııadaǵy QR QK 96-baby 2-bólimi «j», «z» tarmaqtarynda (adamdar toby, aldyn ala sóz baılasý arqyly adamdar toby jasaǵan, paıda tabý maqsatymen, sol sııaqty jaldanyp ne qaraqshylyqpen, qorqytyp alýshylyqpen ne bandıtızmmen adam óltirý) qarastyrylǵan qylmystar jasady degen aıyp taǵylýda.
Sot barysynda aıyptalýshy ózine taǵylǵan aıyptardyń bári negizdi ekenin aıtyp, Erjan Tátishevti óltirgendigin tolyqtaı moıyndaǵan bolatyn.
E. Tátishevtiń ólimi boıynsha M. Toqmádıge qatysty qylmystyq is 79 tomnan turady. Protseske sýdıa Azamat Tilepov tóraǵalyq etýde.
