Murathan Toqmádı ózine esh qysym jasalmaǵanyn málim etti
TARAZ. QazAqparat - Tarazda bankır Erjan Tátishevti óltirdi dep aıyptalyp otyrǵan bıznesmen ári «Depýtattyq korpýs» uıymdasqan qylmystyq tobynyń serkesi Murathan Toqmádıge qatysty qylmystyq is boıynsha bir aptaǵa shegerilgen basty sot otyrysy qaıta bastaldy, dep habarlaıdy «QazAqparat» HAA tilshisi.
Toqmádı 2018 jyldyń 8 naýryzynda 19 saǵat 20 mınýt shamasynda Jambyl oblystyq aýrýhanasynan qashyp ketken. Ol aýrýhanaǵa densaýlyǵy nasharlaǵany jaıly shaǵym túsirgen soń jetkizilgen bolatyn. Arnaıy júrgizilgen sharalardyń arqasynda, jeti saǵattan keıin UQK qyzmetkerleri M.Toqmádıdi Taraz qalasynda ustap, «Jambyl oblystyq qylmystyq atqarý júıesi departamentine qarasty JD-158/1 mekemesine» qamady.
Búgin Jambyl oblysy qylmystyq ister jónindegi mamandandyrylǵan aýdanaralyq sotynda bankır Erjan Tátishevtiń ólimi jónindegi qylmystyq is boıynsha protsess bastaldy. Oǵan tóraǵalyq etip otyrǵan Azamat Tilepov otyrystyń basynda, BAQ ókilderiniń qatysýymen Toqmádıge qashýynyń sebebin surady. Biraq sottalýshy bul suraqqa jaýap bermedi. «Sizge qandaı da bir qysym kórsetildi me?» - dep surady sýdıa. Oǵan sottalýshy: «Joq, qysym kórsetilgen joq», - dep jaýap berdi.
Odan soń kúnniń alǵashqy jartysynda iske qatysy bar UQK burynǵy basshysy Nartaı Dútbaevtyń vıdeobaılanysy tyńdalatyny jarııalandy. Sonan soń, jaýap alý kezinde memlekettik qupııalar aıtylýy múmkindigine baılanysty, jýrnalısterden zaldan shyǵýyn surady.
Toqmádı isi boıynsha jaryssózder kúnniń ekinshi jartysyna kóshirildi.
Bankır Erjan Tátishevtiń ólimine qatysty qylmystyq iske 130 kýáger shaqyrylyp, sonyń 73-inen jaýap alynǵan, 57-siniń jaýaby jarııalanǵan.
Kýágerlerdiń túsiniktemelerinen sottalýshy M. Toqmádı men óltirilgen bankır E. Tátishev, UQK-nyń burynǵy basshysy N. Dútbaev jáne óltirýge tapsyrys bergen qashqyn olıgarh M. Áblıazov arasyndaǵy qatynastardyń jalpy kartınasy belgili bola bastady. Memlekettik aıyptaýdyń ókili sot talqylaýy barysynda aty atalǵan jáne E. Tátishevtiń ólimine qatysy bar tulǵalarǵa qatysty materıaldar jeke qylmystyq iske jiktelip, tergeý júrgiziletinin jetkizdi.
Eske sala keteıik, «KazStroıSteklo» JShS ıesi Murathan Toqmádıge «Turan Álem Banki» AQ burynǵy basshysy Erjan Tátishevti óltirdi degen aıyp taǵylýda. Oǵan tapsyrys berýshi retinde, «Turan Álem Banki» AQ basshysynyń ólimin $4 mln-ǵa baǵalaǵan qashqyn olıgarh Muhtar Áblıazovtiń esimi atalǵan. Buryn Toqmádı «abaısyzda óltirgeni» úshin bir jylǵa sottalyp, artynsha raqymshylyqpen túrmeden bosatylǵan. 2017 jyly M.Toqmádıge 1997 jylǵy redaktsııadaǵy QR QK 96-baby 2-bólimi «j», «z» tarmaqtarynda (adamdar toby, aldyn ala sóz baılasý arqyly adamdar toby jasaǵan, paıda tabý maqsatymen, sol sııaqty jaldanyp ne qaraqshylyqpen, bopsalaýmen ne bandıtızmmen adam óltirý) qarastyrylǵan qylmystar jasady degen aıyp taǵylyp, úsh jylǵa bas bostandyǵynan aıyrylǵan. Bas prokýratýra bankır Erjan Tátishevtiń ólimine qatysty jańa derekter boıynsha tekseris júrgizip, osy is boıynsha sot óndirisi qaıta bastalǵan.
E. Tátishevtiń ólimi boıynsha M. Toqmádıge qatysty qylmystyq is 79 tomnan turady. Protseske sýdıa Azamat Tilepov tóraǵalyq etýde.
