Muratbaev Astana áýejaıynda kofe 2500 teńge turatynyna kúmán keltirdi
ASTANA. QazAqparat - «Airport Management Group» JShS Bas dırektorynyń orynbasary Asqar Muratbaev Astana áýejaıynda kofe 2500 teńge turatynyna kúmán keltirdi, dep habarlaıdy QazAqparat.
«Áýejaıda kofe 2500 teńge turatyny shyndyqqa janaspaıdy, men onda kofeni 600 teńgeden ishemin. Áýejaıdyń ekinshi qabatynda sol jaǵynda tamasha dámhana bar, sonda kofe 600 teńge turady, qatelespesem, bıyl aqpan nemese naýryz aıynda boldym», - dedi Muratbaev QR Parlamenti Májilisi jumys tobynyń otyrysynan soń tilshilerge bergen suhbatynda.
«Astana áýejaıynda jarty lıtr sý úshin 700 teńge degen baǵa bar-joǵyn bilmeımin. Senimdi emespin. Olar áldeqaıda tómen... onda sýdy bir ǵana monopolıst satyp jatqan joq. Ol jerde dál sondaı taýar satatyn, bir-birimen básekeles birneshe saýda núkteleri bar», - dedi ol.
Sonymen qatar tilshiler «EKSPO kezinde Astana áýejaıy atalmysh baǵalarmen shetel týrısterin qalaısha kútip alýdy josparlap otyr?» degen saýal qoıdy.
«Men qatelespesem, Astana áýejaıynda 8 eýroǵa tamaqtanýǵa bolady. Bul qaltaǵa salmaq salmaıdy», - dep túıdi Muratbaev.
Eske salsaq, byltyr A. Muratbaev Astana áýejaıyndaǵy dúkender men dámhanalardyń baǵalary tómendetiledi dep sendirgen bolatyn.
Degenmen áýejaıdaǵy baǵalarǵa qatysty jurt narazylyǵy áli seıiler emes.
