Murat Jurynov basqaratyn Ulttyq ǵylym akademııasy jabyldy ma
ASTANA. KAZINFORM – Murat Jurynov basqaratyn Ulttyq ǵylym akademııasy jabyldy ma? Bul saýalǵa Ǵylym jáne joǵary bilim vıtse-mınıstri Darhan Ahmed-Zákı Jibek Joly telearnasynyń JJ Talk baǵdarlamasy efırinde jaýap berdi.
Efır kezinde Darhan Ahmed-Zákı Prezıdent janyndaǵy Ulttyq ǵylym akademııasy mártebesiniń zańmen retteletinin aıtyp jatqanda baǵdarlama júrgizýshisi spıkerdiń sózin bólip, «buǵan deıingi ǵylym akademııasy jabyldy ma?» degen saýal qoıdy.
«Ol jabylǵan joq. Keleshekte jabylatyn shyǵar. Ol akademııa — qoǵamdyq birlestik. Jańa akademııanyń jańa mártebesi bolady», — dep qysqa qaıyrdy vıtse-mınıstr.
Eske sala keteıik, ótken jyly qarashada Jibek Joly telearnasynyń «Ýáde» baǵdarlamasyna bergen suhbatynda Ǵylym jáne joǵary bilim mınıstri Saıasat Nurbek Murat Jurynov basqaratyn Ulttyq ǵylym akademııasy taraýy tıis degen bolatyn.
«KSRO kúıregen 90-shy jyldary memlekettik mártebesi bolǵan, akademık Qanysh Sátbaev negizin qalaǵan Ǵylym akademııasy mártebesin joǵalta bastady. Sol kezde akademııada birneshe transformatsııa boldy. Máselen, óte bir qyzyq format — sol kezdegi Bilim mınıstri Shkolnık Ǵylym akademııasynyń prezıdenti laýazymyn qosa atqarǵan. 2003 jyly akademııa memlekettik emes uıym retinde bólinip shyǵyp, memlekettik mártebesin joǵaltty. Osy kúnge deıin Murat Jurynov basqaryp kele jatqan akademııa respýblıkalyq memlekettik emes qoǵamdyq birlestik retinde jumysyn atqaryp keledi. Onyń óziniń birneshe quzireti boldy. Mysaly, ol jyl saıyn ǵylym týraly esepti pysyqtap, Prezıdentke usynady. Birneshe ǵylymı basylym shyǵaryp, basqarady», — degen edi vedomstvo basshysy.
