Murat Tóltebaev: Eń bastysy - halyqtyń densaýlyǵy
«Elimizde jarııalanǵan tótenshe jaǵdaı osy qıyndyqtan shyǵýdyń eń tóte joly dep túsinemin. Memleket basshysy kúni keshe arnaıy jıynda málimdeme jasap, kóptiń kókeıindegi máselelerdiń núktesin qoıdy. Karantınge jabylǵan qalalardan jer-jerlerge aǵylǵan halyqtyń arasynda ýaqytsha jumysynan aıyrylǵan adamdarǵa jańa jumys oryndaryn taýyp, memleket qoldaý kórsetetindigin jetkizdi. Sonymen qatar, qarapaıym halyqtyń bereshekterine ýaqytsha toqtam jasatyp, halyqtyń ál-aýqatynyń nasharlamaýynyń aldyn aldy», - deıdi máslıhat depýtaty.
Onyń aıtýynsha, eń aldymen halyqtyń saýlyǵyn qamtamasyz etý úshin barlyq saqtyq sharalaryna muqııat bolý kerek.
«Prezıdenttiń bul bastamalary osy qıyn-qystaý kezeńde eldi ábigerge túsirmeýdiń eń tıimdi joly dep túsindik. Sondyqtan, barlyq sharalardy saqtap, dúrbeleń týdyrmaı, asa saqtyqpen bul qıyndyqty jeńýge atsalysýymyz kerek», - dep atap ótti Murat Tóltebaev.
Eske sala keteıik, keshe Qasym-Jomart Toqaevtyń tóraǵalyǵymen tótenshe jaǵdaı jónindegi memlekettik komıssııanyń otyrysy ótken edi. Onda Prezıdent dárigerlerge alǵys aıtty.
«Sizderge shynaıy alǵysymdy aıtamyn. Úkimet pen ákimderge qosymsha qarjy taýyp, koronavırýsqa qarsy kúres jumystaryna tartylǵan dárigerlerge, polıtsııa qyzmetkerlerine jáne ózge de mamandarǵa 1 aılyq kóleminde syıaqy berýdi tapsyramyn», – dedi Memleket basshysy.
