Murat Ónal: Ata-anam atajurtqa shyǵaryp salarda «fýtbol oınamasań da, Qazaqstanda qalýǵa umtyl» dedi
ASTANA. QazAqparat - Gollandııadaǵy qandasymyz Murat Ónal atajurtqa alǵash ret taban tiredi. Aty ańyzǵa aınalǵan «Aıaks» fýtbol mektebiniń túlegi qazaqstandyq «Qyran» komandasymen kelisim-shartqa otyrǵan bolatyn. Shymkenttik komandaǵa arnaıy shaqyrtýmen kelgen sportshy qala ákimi Darhan Satybaldynyń qabyldaýynda boldy, dep habarlaıdy alaman.kz «Otyrar» arnasyna silteme jasap.
Murat Ónal kári qurlyqtan Shymkent qalasynyń ákimine kádesyı retinde ákelgen Gollandııa ulttyq quramasynyń jeıdesin tartý etti. Sondaı-aq, ol Shymkentte qazaqtardyń kóptigine rıza bolǵanyn jasyrmady. Aıtýynsha, Gollandııada qyryq shaqty qazaq otbasy turady eken.
«Osynsha kóp qandastarymdy ómirimde alǵash ret kórdim. Maǵan osyndaı múmkindik syılaǵan Shymkent qalasynyń ákimine sheksiz alǵys aıtamyn. Munda meniń ana tilimdi úırenýime kóptegen qazaq balalary kómektesýde», - dedi ol.
Túrkııada týyp, Gollandııada ósken Murat Ónal aǵylshyn jáne túrik tilderinde sóıleıdi.
«Maqsatym - qazaq qyzyna úılenip, osynda otbasyn qurý. Ata-anam meni atajurtqa shyǵaryp salarda «fýtbol oınamasań da, Qazaqstanda qalýǵa umtyl» degen-di. Áke-sheshemniń úmitin aqtaýǵa tyrysamyn. Qazaqstannyń Gollandııadan aıyrmashylyǵy kóp. Maǵan «Aıaks» fýtbol mektebinde jattyǵý baqyty buıyrdy. Biraq, onda qazaq balalarynyń kópshiliginde fýtbolmen aınalysý múmkindigi joq. Sebebi, ondaǵy sport mektepterinde oqý úlken qarjyny talap etedi. Al qyzǵaldaqtar elindegi qandastardyń kópshiliginde ondaı múmkindik joq. Sol sebepti, qazaq balary er jete jumys istep, qarajat tabýǵa tyrysady», - deıdi Murat.
