Murat Nurtileý Túrikmenstan Prezıdentimen júzdesti
Túrikmenstan Prezıdenti Serdar Berdimuhamedov Qazaqstan Premer-Mınıstriniń orynbasary – Syrtqy ister mınıstri Murat Nurtileýdi qabyldady, dep habarlaıdy Kazinform tilshisi Ashhabadtan.
«Ózderińizde biletindeı, bul elge osydan 3 kún buryn Syrtqy ister mınıstri Rashıd Meredovtiń shaqyrýymen kelgen edim. Sapar aıasynda Syrtqy ister mınıstrliginde kelissóz ótti. «Ortalyq Azııa – EQYU» formatynda kezdesý boldy. Búgin «Ortalyq Azııa - Koreıa» formatynda taǵy bir kezdesý ótkizbekpiz. Menińshe, bul - ortaq máselelerimizdi talqylaý úshin óte tamasha múmkindik. Árıne, sizderdiń Memleket basshyńyzdyń resmı qabyldaýy Túrikmenstanǵa kelý baǵdarlamamnyń negizgi pýnkti sanalady», - dedi Murat Nurtileý kezdesýden keıin Qazaqstan jáne Túrikmenstan BAQ ókilderine bergen suhbatynda.
Osy oraıda Qazaqstan Syrtqy ister mınıstri Túrikmenstan Prezıdentine óte jyly qabyldap, ashyq áńgimeleskeni úshin rızashylyǵyn bildirdi.
«Baýyrlas elge ushyp kelgenimdi sezindim. Biz elimizdiń ekijaqty, kópjaqty sıpattaǵy yntymaqtastyq máselelerin talqyladyq. Qazaqstan Prezıdenti Qasym-Jomart Toqaevtyń sizderdiń Prezıdentke jyly lebizin, izgi tilegin jetkizdim. Sonymen qatar ekijaqty kúntártibiniń birqatar máselesine qatysty pikir almastyq. Onyń ishinde ekijaqty saıası dıalogymyzdy jandandyrý nemese joǵary qarqynyn ustap turý, BUU, IYU, Ortalyq Azııa Memleket basshylarynyń konsýltatıvtik kezdesýleri syndy kópjaqty qurylymdar aıasyndaǵy is-qımylymyz jaıly sóılestik»,- dedi ol.
Murat Nurtileý Qazaqstan men Túrikmenstannyń ustanymdary bir-birimen saı keletinin sóz etip, Astana men Ashhabad arasyndaǵy ózara is-qımyl jemisti bolatynyna senim bildirdi.
Sonymen qatar mınıstr eki el arasyndaǵy saýda-sattyq qarqyny joǵary ekenin atap ótti.
Aıtýynsha, aldaǵy ýaqytta onyń kólemin 1 mlrd dollarǵa jetkizý josparlanyp otyr.
«Mundaı ýaǵdalastyqqa 2021 jáne 2022 jyldary Meleket basshylary deńgeıindegi ekijaqty sapar barysynda qol jetken bolatyn», - dedi Qazaqstan Syrtqy ister mınıstri.
