Qazaqstan men Pákistan 2025–2026 jyldarǵa arnalǵan is-sharalar josparyna qol qoıdy
ISLAMABAD. KAZINFORM — QR Premer-Mınıstriniń orynbasary — Syrtqy ister mınıstri Murat Nurtileý Pákistan astanasy Islamabad qalasyna resmı saparmen bardy. Bul saparda qazaqstandyq delegatsııa Pákistannyń prezıdenti Asıf Alı Zardarımen, premer-mınıstri — Shahbaz Sharıfpen, syrtqy ister mınıstri –– Muhammad Ysqaq Darmen kezdesedi.
— Bul — Pákistanǵa jasaǵan meniń alǵashqy resmı saparym. Biz ózara yntymaqtastyq pen yqpaldastyq aıasyn keńeıtýge ázirligimizdi jáne halyqtarymyzdy burynǵydan da jaqyndastyrýǵa degen yntamyzdy kórsetkimiz keledi. Bizdiń áriptestigimiz ben senimdi dostyǵymyz qazirdiń ózinde tereń ári berik. Bizdiń tamyrlarymyz ýaqyt synynan ótken, ári olardyń budan da ári qaraı ósip-órkendeýge zor áleýeti bar. Sońǵy 30 jyldan astam ýaqyttaǵy mazmundy saıası dıalog ózara yqpaldastyqtyń jańa baǵyttaryn aıqyndaýǵa múmkindik berdi. Sondyqtan bizdiń yntymaqtastyǵymyzdyń aýqymy óte keń. Keshe men sizderdiń qurmetti áriptesterińizben, resmı tulǵalarmen júzdesip, mańyzdy da qyzyqty máselelerdi talqyladym, iskerlik ortadan jańa dostar tabýǵa múmkindik aldym. Eki baýyrlas memleket arasyndaǵy qarym-qatynasty jańa deńgeıge kóterý úshin kúsh-jiger jumsaýǵa tolyq daıynmyn, — dedi M. Nurtileý Pákistannyń Syrtqy ister mınıstrliginde keńeıtilgen formattaǵy ekijaqty kezdesýde.
Kezdesý qorytyndysy boıynsha, Murat Nurtileý men Muhammad Ysqaq Dar Qazaqstan Respýblıkasy Syrtqy ister mınıstrligi men Pákistan Islam Respýblıkasy Syrtqy ister mınıstrligi arasyndaǵy 2025-2026 jyldarǵa arnalǵan is-sharalar josparyna qol qoıdy.
Sonymen birge, qazaqstandyq tarap Pákistannyń iri kompanııalarynyń ókilderimen (National Logistics Corporation, TCS Logistics) jıyn ótkizdi.
Aıta keteıik, Qazaqstan men Pákistan arasyndaǵy dıplomatııalyq qatynastar 1992 jyldyń 24 aqpanynda ornaǵan.
QR Qarjy mınıstrligi Memlekettik kirister komıtetiniń málimetinshe, 2025 jyldyń qańtar-maýsym aılarynda Qazaqstan men Pákistan arasyndaǵy taýar aınalymy 86,8 mln AQSh dollaryna jetken. Onyń ishinde eksport — 55,3 mln AQSh dollaryn, ımport — 31,5 mln AQSh dollaryn quraǵan.
Jyl basynan beri Qazaqstan men Pákistan arasyndaǵy taýar aınalymy 2,5 esege ósip, 86 mln AQSh dollaryna jetken. Qazaqstanda pákistandyq kapıtaldyń qatysýymen 240-tan astam kásiporyn jumys isteıdi. Almatyda Pákistannyń saýda ókildigi ornalasqan.
Mınıstrler óńirlik jáne jahandyq kún tártibi, onyń ishinde BUU, AÓSShK, ShYU, IYU sheńberindegi dıalog, sondaı-aq eki memlekettiń halyqaralyq bastamalaryn ilgeriletý kezinde ózara qoldaý kórsetý máseleleri boıynsha pikir almasty.
Mádenı-gýmanıtarlyq yntymaqtastyqtyń perspektıvalary bólek talqylanyp, mınıstrler gýmanıtarlyq almasýlarǵa, sonyń ishinde týrızm, sport jáne bilim berý salasyndaǵy kooperatsııany nyǵaıtýǵa jańa serpin berýge ózara nıetin rastady.
Kelissózder qorytyndysy boıynsha taraptar saıası dıalogty jalǵastyrýǵa, basym sektorlardaǵy birlesken jobalardy jandandyrýǵa jáne beıindi memlekettik organdar arasynda tıimdi úılestirýdi qamtamasyz etýge ýaǵdalasty.
Kezdesý sońynda Qazaqstan men Pákistan syrtqy ister mınıstrlikteri arasynda 2025-2026 jyldarǵa arnalǵan birlesken is-qımyl josparyna qol qoıyldy. Bul qujat qol jetkizilgen ýaǵdalastyqtardy dáıekti iske asyrýdyń mańyzdy quralyna aınalmaq.
Budan buryn Prezıdent Qasym-Jomart Toqaev Pákistan Islam Respýblıkasynyń Táýelsizdik kúnine oraı Premer-mınıstr Shahbaz Sharıfke quttyqtaý jedelhatyn joldaǵanyn jazǵan edik.