Murat Nurtileý ózbek mamandaryn dıplomattar men medıtsına qyzmetkerleri kýrstaryna shaqyrdy
ASTANA. KAZINFORM – Qazaqstan men Ózbekstanda mekendeıtin qandastarymyz eki eldi eldestiretin «altyn kópir» sanalady. Bul týraly elordada Ózbekstan Syrtqy ister mınıstri Bahtıer Saıdovpen keńeıtilgen quramdaǵy kelissózderden keıingi brıfıngte Premer-Mınıstrdiń orynbasary – Syrtqy ister mınıstri Murat Nurtileý aıtty.
«Qazaqstan men Ózbekstanda mekendeıtin qandastarymyz eki eldi eldestiretin «altyn kópir» sanalady. Ózderińiz bilesizder, Qazaqstan aýmaǵynda 500 myńǵa jýyq ózbek tursa, Ózbekstanda 800 myńǵa jýyq qazaq mekendep otyr. Olardyń barlyǵy eki eldi jaqyndastyratyn jaqsy faktor dep qarastyramyz. Memleketter tarapynan qandastarymyzdy ne bolmasa dıasporlardy qoldaý úshin tıisti jaǵdaı jasalǵan. Mektepter bar, gazetter shyǵady. Qazaqstanda 2 ózbek teatry bar. Sondyqtan osy baǵytta ary qaraı kelise otyryp, tıis qadamdar jasaýǵa ýaǵdalastyq», - dedi Murat Nurtileý.
Onyń atap ótýinshe, Qazaqstan men Ózbekstannyń ózara Mádenıet kúnderi turaqty ótkiziledi. Jastar arasynda belsendi dıalog ornatyldy. búginde Qazaqstannyń joǵary oqý oryndarynda Ózbekstannyń 6 myńnan astam azamaty bilim alyp jatyr.
«Ótken jyly Almatyda Qazaq ulttyq agrarlyq zertteý ýnıversıtetiniń bazasynda «Tashkent ırrıgatsııa jáne aýyl sharýashylyǵyn mehanıkalandyrý ınjenerleri ınstıtýtynyń» fılıaly jumysyn bastady. Jaqynda Chırchık qalasynda M. Áýezov atyndaǵy Ońtústik Qazaqstan ýnıversıtetiniń fılıaly ashyldy», - dedi ol.
Mınıstr qazaqstandyq KazAID agenttigi arqyly uıymdastyrylatyn jas memlekettik qyzmetkerler, dıplomattar jáne medıtsına qyzmetkerleri úshin bilim berý kýrstaryna ózbek mamandaryn shaqyrǵanyn atap ótti.
«Ózbek tarapyna bizdiń usynymyzdy qabyldap otyrǵany úshin taǵy da rızashylyǵymdy bildiremin», - dedi Murat Nurtileý.
