Murat Nurtileý: Kıpr – Qazaqstannyń EO-daǵy senimdi seriktesteriniń biri
ASTANA. KAZINFORM - Búgin QR Premer-Mınıstriniń orynbasary – Syrtqy ister mınıstri Murat Nurtileý Kıpr Respýblıkasy Syrtqy ister mınıstri Konstantınos Kombospen kezdesip, ekijaqty baılanystyń basym baǵyttaryn talqylady.
Murat Nurtileý kıprlyq áriptesine shaqyrtýdy qabyl alyp, Qazaqstanǵa alǵashqy resmı saparmen kelgeni úshin alǵysyn bildirdi.
– Sizdiń saparyńyzdy dostyq pen áriptestikke negizdelgen ózara tıimdi qarym-qatynastardy damytýǵa jasalǵan ıgi qadam dep qabyldaımyz. Biz bul baǵytta Nıkosııamen birlesip jumys atqarýǵa kámil múddelimiz. Kıpr Respýblıkasy – Qazaqstannyń Eýropa Odaǵyndaǵy mańyzdy ári senimdi áriptesteriniń biri. Sońǵy jyldary eki el arasyndaǵy saıası dıalog pen jan-jaqty yqpaldastyqty keńeıtýge baǵyttalǵan biraz ıgi is-áreketter jasalýda. Osy tusta, Astana qalasynda Kıpr Respýblıkasynyń Elshiligin ashý bastamasyn joǵary baǵalaımyz. Dıplomatııalyq mıssııanyń ashylýyna Qazaqstan Úkimeti tolyqtaı qoldaý kórsetýge daıyn, – dedi M.Nurtileý.
Onyń aıtýynsha, saıası baılanystardy jańa belesterge shyǵarý aıasynda bıik jáne joǵary deńgeıde saparlarmen almasý óte mańyzdy.
– Konstantınos Kombos myrzamen mazmundy ári nátıjeli kelissózder ótkizdik. Ekijaqty yntymaqtastyqtyń perspektıvalyq baǵyttaryn júıeli saralap, ekonomıkalyq baılanystar órisin keńeıtýge degen ortaq nıetimizdi rastadyq. Ásirese, ozyq tehnologııalar, aýyl sharýashylyǵy, týrızm, kólik, logıstıka sııaqty mańyzdy salalarǵa aıryqsha nazar aýdaryldy. Ekijaqty qatynastardyń túp ózegi – ınvestıtsııalyq qarym-qatynastar da nazardan tys qalǵan joq. Atap aıtsaq, sońǵy 20 jylda Qazaqstan ekonomıkasyna Kıprden 4 mlrd dollardan astam tikeleı ınvestıtsııa tartyldy. Óz kezeginde elimizden Kıprge salynǵan ınvestıtsııalar 1,4 mlrd dollardy qurady. Qazirgi tańda Qazaqstan aýmaǵynda Kıpr kapıtalynyń qatysýymen 326 kompanııa jumys atqarýda, – dedi Murat Nurtileý.
Kıpr Respýblıkasy Syrtqy ister mınıstri Konstantınos Kombos óz kezeginde dostyq iltıpat tanytyp, Qazaqstanǵa alǵashqy resmı sapar jasaýǵa múmkindik jasaǵan QR Premer-Mınıstriniń orynbasary – Syrtqy ister mınıstri Murat Nurtileýge rızashylyǵyn bildirdi. Sondaı-aq, aldaǵy ýaqytta eki el arasyndaǵy saıası, ekonomıkalyq qarym-qatynas nyǵaıa túsetinine senim bildirdi.
