Murat Nurtileý AQSh Memlekettik hatshysy Marko Rýbıomen birqatar máseleni talqylady

ASTANA. KAZINFORM – Qazaqstan Premer-mınıstriniń orynbasary – Syrtqy ister mınıstri Murat Nurtileý bastaǵan qazaq delegatsııasy resmı saparmen Vashıngton qalasyna bardy. Sapar aıasynda QR Syrtqy ister mınıstri men AQSh Memlekettik hatshysy Marko Rýbıonyń mazmundy kezdesýi ótti.

Kezdesý barysynda AQSh-tyń Qazaqstannyń táýelsizdigine, egemendigine jáne aýmaqtyq tutastyǵyna berik qoldaýyn taǵy bir márte rastady. Memlekettik hatshy Rýbıo men Premer-Mınıstrdiń orynbasary – Syrtqy ister mınıstri Nurtileý ekijaqty saýda men ınvestıtsııa kólemin arttyrý múmkindikterin, sondaı-aq, AQSh kompanııalary úshin senimdi ınfraqurylym men qolaıly retteýshi ortanyń mańyzdylyǵyn talqylady.

Sonymen qatar Syrtqy saıası vedomstvolardyń basshylary Qazaqstan men AQSh arasyndaǵy ózara qurmet pen pragmatıkalyq dıalog qaǵıdattaryna negizdelgen Keńeıtilgen strategııalyq seriktestikti odan ári damytýǵa umtylysyn rastady. Áńgime barysynda amerıkalyq ozyq tehnologııalardy tartý jáne iskerlik baılanystardy nyǵaıtý máselelerine erekshe nazar aýdaryldy.

– Qazaqstan AQSh-pen ózara tıimdi seriktestikti ilgeriletý úshin naqty nátıjelerge qol jetkizýge nıetti, – dedi M.Nurtileý.

Sonymen qatar Mınıstr Qazaqstannyń energııa resýrstary men asa mańyzdy mıneraldardyń jetkizý tizbeginiń turaqtylyǵyn qamtamasyz etýdegi strategııalyq rólin atap ótti.

– AQSh qaýipsizdik salasyndaǵy áriptestikti keńeıtý, C5+1 dıplomatııalyq alańy arqyly óńirlik ıntegratsııany ilgeriletý jáne tehnologııa men mańyzdy paıdaly qazbalar sektorlarynda ózara tıimdi kommertsııalyq múmkindikterdi qarastyrý baǵytynda Qazaqstanmen birlese jumys isteýdi jalǵastyrýǵa nıetti, - delingen baspasóz hatshysy Temmı Brıýs usynǵan aqparatta.

Aıta keteıik, Marko Rýbıo óz vedomstvosyn qaıta jasaqtaıtynyn málimdegen edi.