Murat Nurtileý: Qazaqstan úshin Lıýksembýrgpen áriptestikti damytý – syrtqy saıasattaǵy basymdyqtyń biri
«Jańa ǵana Lıýksembýrg Uly Gertsogtiginiń Syrtqy jáne eýropalyq ister jónindegi mınıstri Jan Asselborn myrzamen ekijaqty kelissózder ótkizdik. Kezdesý qorytyndysy boıynsha ózara múddelik tanytatyn barlyq ózekti máselelerdi jan-jaqty talqylap, qazaq-lıýksembýrg qarym-qatynastarynyn bekite túsýge baǵyttalǵan ýaǵdalastyqtarǵa qol jetkizdik dep aıtýǵa bolady. Bul mınıstr Asselbornnyń Qazaqstanǵa tuńǵysh resmı sapary. Sondyqtan áriptesime jáne onyń delegatsııasyna Astanaǵa taǵy da qosh keldińizder deı kele, shaqyrýymdy qabyl alǵany úshin alǵys bildiremin», - dedi mınıstr lıýksembýrgtik áriptesimen kelissózderden keıingi brıfıngide.
Onyń atap ótýinshe, búgingi sapardyń ózindik sımvoldyq maǵynasy bar. 31 jyl buryn 29 maýsymda eki el arasynda alǵash ret dıplomatııalyq qatynastar ornatylǵan bolatyn.
«Sol kezden beri taraptarymyz ekijaqty saıası, ekonomıkalyq, ınvestıtsııalyq jáne gýmanıtarlyq baılanystardy nyǵaıtyp kóptegen belesterdi birlese eńserip keledi. Osy rette, Qazaqstan úshin Lıýksembýrgpen dostyq pen ózara senimge negizdelgen áriptestikti damytý – syrtqy saıasatymyzdyń eýropalyq baǵyttaǵy mańyzdy basymdyqtarynyń biri ekenin málimdegim keledi. Jalpy, biz saıası salada dıalogty mazmundyq jáne uzaq merzimdi prıorıtetter turǵysynan ári qaraı órbitýge úlken mán beremiz. Sondyqtan, bıik jáne joǵary deńgeıdegi baılanystarǵa turaqty sıpat berýge, sondaı-aq saýda-sattyq pen mádenı-gýmanıtarlyq alys-berisimizdiń aýqymyn keńeıtýge múddelimiz», - Murat Nurtileýuly.
Mınıstr memleket, Parlament, Úkimet basshylyqtarynyń saparlarymen almasýǵa, kópjaqty is-sharalar aıasynda kezdesýlerdi júıeli túrde ótkizýge sóz baılasqanyn atap ótti.
«Kún tártibindegi máseleler boıynsha pikir almasýdy jalǵastyrý jáne jańa baǵyttar ashý maqsatynda kelesi jyly Astanada Syrtqy ister mınıstrlikteri arasynda konsýltatsııalardyń kezekti raýndyn ótkizýge daıynbyz. Qazaqstan men Lıýksembýrg halyqaralyq qaýymdastyqta ózindik erekshe orny bar kóptegen bastamalardy júzege asyrǵan aımaqtyq kóshbasshy elder.
Bizdiń el sııaqty, Lıýksembýrg te BUU Qaýipsizdik keńesiniń turaqty emes múshesi bolyp saılanǵan. Qazir biz BUU Adam quqyqtary keńesinde qoıan-qoltyq jumys istep júrmiz. Eń bastysy, óńirlik jáne kóptegen halyqaralyq máseleler boıynsha ustanymdarymyz da uqsas. Bastamalarymyzǵa ózara qoldaý kórsetip kelemiz. Qazaqstan men Lıýksembýrg halyqaralyq quqyq prıntsıpterin basshylyqqa alyp, BUU Jarǵysyna sáıkes terrıtorııalyq tutastyq pen egemendikti, ishki isterge aralaspaý, qaqtyǵystardy beıbit jolmen sheshý, tatý kórshilik pen yntymaqtastyq qatynastaryn tolyq qoldaıdy. Halyqaralyq jáne aımaqtyq ózekti máseleler boıynsha, onyń ishinde, Ortalyq Azııa, Aýǵanstan jáne aımaqtyq ıntegratsııalyq úderisteri boıynsha pikir almastyq», - dedi ol.
