Murat Nurtileý Aleksandr Lýkashenkomen kezdesýi qalaı ótkenin aıtyp berdi

MINSK. QazAqparat – Qazaqstan Premer-Mınıstriniń orynbasary – Syrtqy ister mınıstri Murat Nurtileý Belarýs prezıdenti Aleksandr Lýkashenkomen Mınskide jyly shyraıly jáne ashyq-jarqyn kezdesý bolǵanyn aıtty, dep habarlaıdy QazAqparat tilshisi.

Ol Belarýste eldiń syrtqy ister mınıstri Sergeı Aleınıktiń shaqyrýymen resmı saparmen barǵanyn eske saldy. Murat Nurtileý osy saparynda ekijaqty qarym-qatynastyń bolashaǵyn talqylap, Qazaqstan-Belarýs yntymaqtastyǵyn odan ári damytý boıynsha naqty jospar jasaǵanyn atap ótti.

«Meniń saparymnyń eń mańyzdy bóligi – Belarýs kóshbasshysy, qurmetti Aleksandr Grıgorevıch Lýkashenkonyń qabyldaýy. Kezdesý kezinde qymbatty áriptesimmen Qazaqstan men Belarýs arasyndaǵy ekijaqty qarym-qatynasty damytý barysyn aıttyq. Saýda-ekonomıkalyq yntymaqtastyqtyń saıası dıalogyndaǵy mańyzdy máselelerge toqtaldyq, halyqaralyq jaǵdaıdy, mádenı-gýmanıtarlyq yntymaqtastyq máseleleri boıynsha kópjaqty qurylym aıasynda ózara yntymaqtastyqty talqyladyq. Bizdiń kózqarasymyz ortaq. Sondyqtan, kezdesý jyly shyraıly, ashyq-jarqyn, ózara senim jaǵdaıynda ótti. Endi bizdi, syrtqy saıası vedomstvo basshylaryn, alda úlken jumys kútip tur», - dedi Murat Nurtileý prezıdent Aleksandr Lýkashenkomen kezdesýden keıin jýrnalısterge bergen suhbatynda.

Buǵan deıin habarlanǵandaı, Qazaqstan Premer-mınıstriniń orynbasary – Syrtqy ister mınıstri Murat Nurtileýdiń resmı sapary búgin Jeńis alańyna gúl shoqtaryn qoıý rásimimen bastaldy. Belarýs prezıdenti Aleksandr Lýkashenko kezdesý kezinde Qazaqstandy únemi qoldaýǵa ázir ekenin atap ótti.