Murat Nákenov SQO boıynsha qylmystyq atqarý júıesi departamenti basshysy bolyp taǵaıyndaldy

PETROPAVL. KAZINFORM – Soltústik Qazaqstan oblysy boıynsha qylmystyq-atqarý júıesi departamentine Qazaqstan Respýblıkasy ishki ister mınıstriniń buıryǵymen ádilet polkovnıgi Murat Nákenov taǵaıyndaldy.

Vedomstvo ujymyna jańa basshyny Qylmystyq atqarý júıesi komıteti tóraǵasynyń orynbasary Abaı Qaıyrbekov tanystyrdy.

Murat Nákenov 1974 jyly Kókshetaý oblysy burynǵy Qyzyltý aýylynda dúnıege kelgen.

1996 jyly Qazaq memlekettik agrarlyq ýnıversıtetin, al 2003 jyly Qazaqstan Respýblıkasy Іshki ister mınıstrligi akademııasynyń zań ınstıtýtyn bitirgen. Ekonomıst-óndiristi uıymdastyrýshy jáne zańger mamandyqtary boıynsha eki joǵary bilimi bar.

Іshki ister organdaryndaǵy qyzmetin 1997 jyly SQO qylmystyq-atqarý júıesi basqarmasy bólim bastyǵynyń kezekshi kómekshisi qyzmetinen bastady. Sondaı-aq ár jyldary kúzet bólimi bastyǵynyń kezekshi kómekshisi, kolonııa bastyǵynyń jalpy máseleler, tárbıe jumysy, rejım jáne kúzet jónindegi orynbasary, SQO boıynsha qylmystyq-atqarý júıesi departamenti mekemeleriniń bastyǵy, departament bastyǵynyń orynbasary qyzmetin atqardy.

Sońǵy atqarǵan qyzmeti – Qyzylorda oblysy boıynsha qylmystyq-atqarý júıesi departamenti bastyǵynyń orynbasary.

Buǵan deıin Memlekettik qyzmet isteri agenttiginiń SQO boıynsha departament basshysy bolyp Erjan Qarymsaqovtyń taǵaıyndalǵanyn jazǵan edik.