Murat Keńtonov «Qazaqstan Barysynyń» fınalyna qatyspaıtyn boldy

ASTANA. QazAQparat - Astanada jyl saıyn uıymdastyrylyp kele jatqan qazaq kúresinen Elbasy júldesi úshin ótetin «Qazaqstan Barysy» týrnıriniń fınalyna astanalyq balýan Murat Keńtonov qatyspaıtyn boldy, dep habarlaıdy QazAqparat tilshisi.

«Qazaqstan Barysy» qazaq kúresin damytý qorynyń baspasóz qyzmetinen málim etkendeı, týrnırdiń aqtyq básekesine joldama alǵan Murat Keńtonov jattyǵý barysynda jaraqat alǵan. Sol sebepti fınalǵa qatyspaıdy.

Astananyń namysyn Keńtonovtyń ornyna bıylǵy Qazaqstan chempıonatynda «Túıe balýan» ataǵyn jeńip alǵan Aıbat Seıten qorǵaıtyn bolady.

Esterińizge sala keteıik, Aıbat Astana qalasynyń irikteý týrnırinde júldeli úshinshi oryndy jeńip alǵan bolatyn.

«Qazaqstan Barysy» týrnıriniń fınaldyq beldesýleri Astanadaǵy «Barys Arena» stadıonynda 2 shilde kúni ótedi. Uıymdastyrýshylar jarystyń júlde qory byltyrǵydan kem bolmaıtynyn aıtýda.  Aıta keteıik, tamyz aıynda «Álem Barysy» halyqaralyq týrnıri ótetini josparlanýda.

2017 jylǵy «Qazaqstan barysyna» qatysatyn balýandardyń tizimin buǵan deıin jarııalaǵan bolatynbyz.