Murat Ergeshbaev: Jańa Konstıtýtsııa – eldik múdde jolyndaǵy mańyzdy kezeń
QYZYLORDA. KAZINFORM – Qyzylorda oblysynyń ákimi Murat Ergeshbaev oblystyq máslıhattyń kezekti XXXIV sessııasynda jańa Konstıtýtsııanyń kúshine enýi el damýynyń mańyzdy kezeńi ekenin aıtty.
Búgin oblystyq máslıhattyń kezekti XXXIV sessııasyna qatysqan Qyzylorda oblysynyń ákimi Murat Ergeshbaev kúshine engen jańa Ata Zańda azamattardyń quqyqtary men bostandyqtaryn qorǵaý, zań ústemdigin qamtamasyz etý, ádiletti qoǵam qurý basty maqsat retinde belgilengenin atap ótti.
— Jańa Preambýlada baıyrǵy qazaq jerinde memlekettilikti nyǵaıta otyryp, Uly Dalanyń myńjyldyq tarıhı sabaqtastyǵyn saqtaý basty qaǵıdat retinde bekitilgen. Bılik tarmaqtarynyń tepe-teńdigi nyǵaıtylyp, basqarý júıesi zaman talabyna saı jańǵyrtyldy.
Bul — memleketimizdiń tuǵyryn nyǵaıtyp, qoǵamdyq kelisim men turaqtylyqty saqtaýǵa negiz bolatyn mańyzdy qujat. Munyń barlyǵy Qazaqstandy demokratııalyq, quqyqtyq jáne áleýmettik memleket retinde damytýǵa baǵyttalǵan júıeli qadam.
Jańa Ata Zańymyz kúshine engennen keıin Prezıdentimiz 23 tamyzda Quryltaı saılaýyn ótkizý týraly Jarlyqqa qol qoıdy. Ultymyzdyń tarıhyna altyn árippen jazylatyn saıası kezeńde barshańyzdy eldik múdde jolyndaǵy mańyzdy iske belsendi qatysýǵa shaqyramyn, — dedi Murat Ergeshbaev.
Jıynda birqatar azamatqa Memleket basshysy Qasym-Jomart Kemelulynyń jańa Konstıtýtsııanyń kúshine enýine oraı joldaǵan Quttyqtaý haty jáne Konstıtýtsııanyń arnaıy basylymy tabys etildi.
