Murat Ergeshbaev Qyzylorda oblysynyń ákimi laýazymyna taǵaıyndaldy
ASTANA. KAZINFORM – Qyzylorda oblysynyń ákimi laýazymyna Murat Ergeshbaev taǵaıyndaldy. Bul týraly Aqordanyń baspasóz qyzmeti habarlady.
Bul týraly 2026 jylǵy 8 mamyrda belgili boldy. Tıisti jarlyq Aqordanyń baspasóz qyzmeti arqyly jarııalandy.
– Memleket basshysynyń Jarlyǵymen Murat Nálqojauly Ergeshbaev Qyzylorda oblysynyń ákimi laýazymyna taǵaıyndaldy, - delingen habarlamada.
Jańa ákimniń taǵaıyndalýy óńirdi basqarý júıesindegi kadrlyq ózgerister aıasynda júzege asty.
Murat Ergeshbaev 1966 jyly Qyzylorda qalasynda týǵan. Almaty halyq sharýashylyǵy ınstıtýtyn jáne Qazaqstan Respýblıkasy Prezıdentiniń janyndaǵy Ulttyq joǵarǵy memlekettik basqarý mektebin bitirgen.
Eńbek jolyn 1989 jyly Syrdarııa aýdanynda Jambyl keńsharynyń ekonomısti retinde bastap, Syrdarııa aýdandyq ónerkásip birlestiginiń bólim bastyǵy qyzmetterin atqarǵan.
Sondaı-aq oblysta bank salasynda túrli basshylyq laýazymdar atqyryp, QR Tótenshe jaǵdaılar mınıstrliginiń "Órt sóndirýshi" aktsıonerlik qoǵamynyń vıtse-prezıdenti bolǵan.
2008-2017 jyldary Qyzylorda qalasynyń ákimi, oblystyq qarjy basqarmasynyń bastyǵy, Qarmaqshy jáne Shıeli aýdandarynyń ákimi, Almaty qalasy boıynsha tutynýshylardyń quqyqtaryn qorǵaý departamenti basshysynyń orynbasary, "QazAgroÓnim" aktsıonerlik qoǵamynyń basqarýshy dırektory, Qyzylorda oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy qyzmetterin atqarǵan.
2017 jylǵy qazan aıynan bastap 2021 jylǵa deıin Qazaly aýdanynyń ákimi qyzmetin atqardy. 2021–2023 aralyǵynda Syrdarııa aýdanynyń ákimi boldy.
2023 jylǵy naýryzdan bastap ol Qazaqstan Respýblıkasy Parlamenti Májilisi VIII shaqyrylymynyń depýtaty bolyp, AMANAT partııasy partııalyq tizimi boıynsha saılanǵan.
Eske sala keteıik, buǵan deıin Nurlybek Nálibaevtyń QR Premer-Mınıstriniń birinshi orynbasary bolyp taǵaıyndalǵanyn habarlaǵan edik.
