Murat Áıtenov májbúrlep vaktsınalaýǵa qatysty pikir bildirdi

NUR-SULTAN. QazAqparat - Shymkent qalasynyń ákimi Murat Áıtenov halyqty vaktsınalaý týraly onlaın jıynda mektep dırektorlaryn «qamshylaý» týraly tapsyrma bergen orynbasarynyń áreketine pikir bildirdi, dep habarlaıdy QazAqparat.

«Birinshiden, ol maman jaýapqa tartylatyndaı zańdy buzǵan joq. Ol – meniń birinshi orynbasarym. Bul týraly bárimiz bilemiz. Oqıǵa buqaralyq aqparat quraldaryna jaqsy taraldy. Ekinshiden, qazaqtyń «qamshy» degen sózi ártúrli maǵynany bildiredi. Ol tek qamshymen urý degen sóz emes. Qamshylaý degen baqylaýǵa alyp, tikeleı tapsyrma berý degen maǵyna da beredi. Men orynbasarymdy shaqyryp, bul másele týraly sóılestim. «Qamshylaý» degendi qandaı oımen aıtqanyn suradym. Ol baqylaýǵa alý maǵynasynda qoldanǵanyn túsindirdi», - dedi ákim ortalyq kommýnkatsııalar qyzmetinde.

Murat Áıtenov qazir qalada vaktsınatsııa qarqyndy júrip jatqanyn atap, qalaǵa jetken alǵashqy vaktsınany ózine salǵyzǵanyn ese aldy.

«Qazir jaǵdaıdy bilesiz. Vaktsına bárine mindetti emes, biraq vakına alýǵa shaqyrý – ákimshiliktiń jaýapkershiligi. Erteń azamattar aýyryp, basqa da qıyn jaǵdaıǵa ushyrap jatsa, ókinish bolady. Sol sebepti qala turǵyndaryna áli de túsindirip jatyrmyz. Vaktsınadan qorqýdyń qajeti joq. Onyń aǵzaǵa eshqandaı zııany joq. Shymkentke birinshi vaktsına 1 aqpanda jetkizilgen. Sol kezde ózim birinshi bolyp vaktsına alǵanmyn. Qazir, qudaıǵa shúkir densaýlyǵym birqalypty», - dedi shahar basshysy.

Ákimniń aıtýynsha, qazir vaktsına alýǵa múmkindigi bar shymkenttikterdiń 44 paıyzy ekpe qabyldaǵan.