Murat Áýezov - qazaq ádebıetin álemge tanytý úshin eńbek etti - Mereke Qulkenov
ALMATY. KAZINFORM - Almatyda ótken Murat Áýezovpen qoshtasý rásiminde Qazaqstan Jazýshylar Odaǵynyń basqarma tóraǵasy Mereke Qulkenov qoǵam qaıratkeriniń eńbek joly týraly pikir bildirdi.
Onyń aıtýynsha, álem halyqtaryna qazaq ádebıeti men mádenıetin tanytýdaǵy Murat Muhtarulynyń eńbegi eren.
- Biz búgin ulynyń, ǵulamanyń ǵulamasyn máńgilik saparǵa shyǵaryp salǵaly turmyz. Osydan 63 jyl buryn 1961 jyly Muhtar Omarhanuly Áýezovti shyǵaryp salǵan joq sııaqtymyz. Dál búgin shyǵaryp salyp turǵan sııaqtymyz. Óıtkeni Muqańnyń artynan ergen «altyn tuıaǵy» ortamyzdan ketip bara jatyr. Bul - orny tolmas qaıǵy. Murat aǵamyz ákesiniń eń jaqsy qasıetterin boıyna sińirgen. Meıirimin sińirgen, Otanyna degen mahabbatyn sińirgen jáne keremet bilimin sińirgen. Murat Áýezovsiz birde bir belarýs, birde bir ýkraın, birde bir tatar qazaqty tanymaǵan. Óıtkeni ol kisi óziniń kandıdattyǵynyń ózin qazaq ádebıetin álemge tanytý úshin jazǵan. Sondyqtan Muhtar Omarhanuly degen uly adamnyń artynan ergen ulynyń da eline ólsheýsiz eńbek etkeni, eliniń qaıratkeri bolǵany jáne de eliniń mahabbatyna bólengeni - bizdi qýanyshqa bóleıdi, - dedi Mereke Qulkenov.
Eske salaıyq, buǵan deıin Murat Áýezov 81 jasynda dúnıeden ótkenin jazǵan edik.
Al búgin M.Áýezov atyndaǵy Qazaq ulttyq drama teatrynda qoǵam qaıratkerimen qoshtasý rásimi ótti.
