Murat Ábenov: Prezıdent óte ózekti ekologııalyq problemalar týraly sóz qozǵady

NUR-SULTAN. QazAqparat – Ulttyq qoǵamdyq senim keńesiniń múshesi Murat Ábenov Prezıdenttiń ekologııalyq máselelerge baılanysty júktegen tapsyrmalaryna qoldaý bildirdi. Sarapshynyń aıtýynsha qoqys óńdeýmen aınalysatyn kásiporyndardy qazir barynsha yntalandyrý kerek, dep habarlaıdy QazAqparat tilshisi.

«Prezıdenttiń osynaý joǵary deńgeıde Ekologııa mınıstrligi halyq pen qoǵam belsendilerin, sarapshylardy tartyp, júıeli túrde kóterip kele jatqan problemalardy aıtqanyna qýanyshtymyn», - dedi Murat Ábenov.

Sarapshy osyǵan deıin eldegi ekologııalyq máseleler júıeli túrde sheshimin tappaı, olarǵa kommýnaldyq sharýashylyq deńgeıinde de qaralyp kelgenin de aıtyp ótti.

«Sebebi yntalandyratyn faktor joq. Bıznes úshin de, azamattar úshin tólem birdeı. Qalalardyń aınalasynda qurylys qoqystary men medıtsınalyq qaldyqtar úıilip jatyr. Bul jerde qoqysty jınaý úshin ǵana emes, ony óńdeý úshin de yntalandyrýshy faktorlar bolýy tıis. Muny zańnamalyq turǵyda retteý kerek. Bul jerde depozıttik júıeni, qoqys jaǵatyn zaýyttardyń máselesin, qoqys óńdeıtin kásiporyndardy qarjylandyrý isin zerttegen jón. Qoqyspen jumys júrgizýdiń ózi de sol kezde tabys ákelmek. Sonymen qatar qoqysty zańsyz shashatyndardyń da jaýapkershiligin kúsheıtken durys. Alaıda munyń bárin qadaǵalaýdyń elektrondy júıesin engizý arqyly júrgizgen abzal. Árbir kóliktiń janynda bir-bir polıtseıden qoıa almaısyń», - deıdi Murat Ábenov.

Sarapshynyń aıtýyna qaraǵanda qazirgi ýaqytta qaralmaı jatqan aýmaqtardyń ıesi joq.

«Ásirese demalys oryndaryn, tabıǵı aýmaqtardy aıtyp otyrmyn. Jaqynda da Almaty mańyndaǵy Іle-Alataý ulttyq parkinde boldyq. Qoqys úıilip jatyr. Birneshe qoryqshy ol jerdi baqylaýǵa da úlgermeıdi. Eger osyndaı aýmaqty tazalyq pen tártipti saqtaı alatyn jaýapty ınvestorlardyń saýatty basqarýyna beretin bolsaq, ondaǵy qoqys máselesi de retteler edi», - dedi ol.

Murat Ábenovtiń aıtýynsha, balalarǵa mektepte ekologııalyq bilim bermese olar eseıgende qorshaǵan ortanyń qadirin bilmeıdi.

«Máselen mınıstrlik jekelegen uıymdarmen birge mektepterde ekologııalyq saǵattardy ótkizedi. Onda oqýshylarǵa qoqysty bóle-jara salý jaǵy da oqytylady. Balalar osyndaı synaq-sabaqtan ótkennen keıin bir qyzyǵy osy úırengenderin ata-anasyna da úırete bastapty. Ekologııalyq mádenıetti oqytqan óte mańyzdy. Munymen aınalyspaýdyń saldary qoqystyń qordalanyp, jasy tehnologııalarǵa úreılene qaraıtyndaı jaǵdaıǵa ákep soqty», - deıdi ol.

Eske sala ketsek 10 shildede ótken Úkimettiń keńeıtilgen otyrysynda Memleket basshysy Qasym-Jomart Toqaev mektep baǵdarlamasyna «Balalardyń ekologııalyq bilimi» atty jańa pán engizýdi tapsyrǵan bolatyn.

«Bizge qazirgi ýaqytta qoǵamdyq kózqaras turǵysynan mańyzy artyp kele jatqan ekologııa problemasymen aınalysý kerek. Jyl saıyn 5 mln tonnaǵa jýyq turmystyq qatty qaldyq jınalyp qalady. Olardyń 15 paıyzy ǵana óńdelýde. Bul - jetkiliksiz», - dedi Prezıdent.