Murat Ábenov: Para bergenderdi kóbirek jarııa etý qajet
ASTANA. QazAqparat - Para beretin adamdardy kóbirek áshkere etý kerek. Búgin «Atameken» Ulttyq kásipkerler palatasy Prezıdıýmy janyndaǵy «Aqparattyq-kommýnıkatsııalyq tehnologııalar jáne jasyl ekonomıka» komıtetiniń múshesi Murat Ábenov osylaı málim etti, habarlaıdy QazAqparat.
«Joldaǵy jemqorlyq boıynsha kóbine polıtsııa qyzmetkerlerin synaımyz. Al qoǵam ne qarap otyr? Azamattar nege para beredi? Para alǵan polıtsııany ustaımyz da, al nege para bergen adamdardy ustap, jarııa etpeımiz?», - dedi M. Ábenov Ortalyq kommýnıkatsııalar qyzmetindegi baspasóz máslıhatynda.
Onyń sózine qaraǵanda, bul baǵytta 2017 jyl óte belsendi jyl boldy, osy oraıda azamattar óte joǵary belsendilik tanytqan.
«Memlekettik qyzmet isteri jáne sybaılas jemqorlyqqa qarsy is-qımyl agenttigi 2017 jyldyń basynan bastap bizdi shaqyryp (Arnaıy monıtorıng tobyna), jemqorlyqqa qarsy is-qımyldarǵa qatysty usynystarymyzdy nazarǵa aldy. Memleket bir ózi qansha sybaılas jemqorlyqpen kúreskenimen de jetistikke jete almaıdy, ıaǵnı qarjy da, osymen aınalysatyn qyzmetkerler de jetispeıdi. Tek biriksek qana bul baǵyttaǵy problemalardy sheshý múmkin bolady. Memleket óz tarapynan ashyq ári jarııa túrde jumys isteýi kerek, al qoǵam sony qoldaýy tıis. Bul turǵyda jemqorlyq áreketine barǵandardy synaý qajet. Bıznes «meni qysyp jatyr, tekserip jatyr» dep aıqaılaı bermeı, ózi de para bermeýi shart. Ashyq túrde konkýrstarǵa qatysyp, parasyz jumys isteýge ekpin qoıǵany durys. Azamattarymyz ońaı jolǵa túspeı, máselesin paramen sheshpeı, ózi zańdy túrde júrýi kerek. Bul qadamdardyń barlyǵy qatar iske asyrylsa, tek qana sol kezde ǵana sybaılas jemqorlyqty azaıtýǵa bolady», - dedi Ábenov.
Onyń aıtýynsha, birlese atqarylǵan jumystardyń barysynda avkólikterdi tirkeý, mamandandyrylǵan HQKO-lar sharalary áldeqaıda jaqsardy.
«Arnaıy josparlar quryldy. Bul baǵytta ortaq prolemalardy birge sheshtik. Memlekettik organdardyń bir-birimen baılanysy tıisti deńgeıde emestigi baıqaldy. Qazir bul baılanystar kúsheıtilip, aqparattyq bazalar ózara qosyldy. Zańdardy da ózgertýge qatysty usynys berildi. Barlyǵyn júıeli túrde sheshpese bolmaıdy, tek qana memlekettik qyzmetkerlerdi aıyptaı bergen de durys emes», -dedi ol.
Aıta keteıik, baspasóz máslıhatyna Sybaılas jemqorlyqqa qarsy strategııany júzege asyrýdyń syrtqy saraptamasy men baǵalaý jónindegi arnaıy monıtorıng toby músheleri qatysyp, olar ózderiniń alǵashqy nátıjelerimen bólisti.
