Murat Ábenov: Nesıe alaıaqtyǵynyń 90 paıyzy bank qyzmetkerleriniń qatysýymen jasalady
ASTANA. KAZINFORM — Bankter týraly Zań osydan 30 jyl buryn qabyldanǵanymen, keıingi ýaqytta oǵan tek azdaǵan ózgerister men tolyqtyrýlar engizildi. Degenmen, bul túzetýler qarjy salasyndaǵy ózekti ári kúrdeli máselelerdi túbegeıli sheshýge múmkindik bergen joq.Búginde bank júıesindegi keıbir qyzmetkerlerdiń qatysýymen jasalatyn alaıaqtyq oqıǵalary jıilep otyr. Bul týraly Jibek Joly telearnasyndaǵy «Búgin LIVE» baǵdarlamasynda QR Parlamenti Májilisiniń depýtaty Murat Ábenov aıtty.
— Ókinishke qaraı, alaıaqtyq kóbeıip keledi. Qazir bul baǵytta jańa zań jobasyn úshinshi ret qarap jatyrmyz. Degenmen bank salasynyń keıbir ókilderi ózgerister engizýge kedergi keltirip otyr. Bıometrııalyq sáıkestendirýdiń zańsyz júrgizilgen jaǵdaılary kóp. Zań boıynsha adam ózi baryp, vıdeosy túsirilip, beıne jazbadaǵy túr álpetimen sáıkestigi tekserilýi tıis. Eger bıometrııa zańsyz ótse, bank óz tarapynan nesıeni jabýy kerek, sebebi bul bank kinási. Buǵan deıin mundaı talap bolmaǵan, — dedi Murat Ábenov.
Onyń aıtýynsha, bank bıometrııa júrgizý úshin azamattan jazbasha kelisim alyp, beıne jáne fotosýretin zańdy túrde tirkeýi qajet. Eger bul talap saqtalmasa, mundaı rásimniń barlyǵy jaramsyz bolyp sanalady.
— Mysaly, Qostanaı oblysynyń bir azamatyna nebári bir saǵat ishinde bes bank jeti nesıe berip, jalpy somasy 16,5 mln teńge bolǵan. Tekserý barysynda ol azamat bıometrııadan ótpegeni, qol qoımaǵany jáne bankke barmaǵany anyqtaldy. Bul jaǵdaıda nesıe jalǵan bıometrııa arqyly rásimdelgen bolyp shyqty, — dedi ol.
Murat Ábenovtiń sózinshe, alaıaqtar keı jaǵdaıda bank qyzmetkerlerimen aldyn ala sóz baılasyp, nesıe rásimdeý shemalaryn qoldanady.
— Alaıaqtar adamdardy toptastyryp, bir adamdy daıyndaıdy. Sol adamǵa nesıe rásimdetý úshin bank qyzmetkerlerine 1-2 paıyz syıaqy tóleıdi. Keıbir menedjerler de bul iste úles alyp otyr. Jalpy nesıelik alaıaqtyqtyń 90 paıyzy bank ishindegi qyzmetkerlerdiń qatysýymen jasalyp jatyr. Sondyqtan eń aldymen sol sybaılastardy anyqtap, jazalaý qajet, — dedi depýtat.
Sonymen qatar ol jańa zań jobasynda azamattardyń qarjy qaýipsizdigin kúsheıtýge baǵyttalǵan naqty sharalar qamtylatynyn atap ótti.
— Birinshiden, azamat bankke óz aıaǵymen kelmeı jáne jeke qol qoımaı onlaın nesıe berýge bolmaıdy. Ekinshiden, elektrondy qoltańba tek adamnyń jeke ruqsatymen paıdalanylýy tıis. Úshinshiden, bıometrııany bank ózi túsirip, beınemen salystyrýy qajet. Tórtinshiden, árbir nesıe rásimin jeke-jeke tekserý qajet, — dedi Murat Ábenov.
Buǵan deıin Qazaqstanda alaıaqtar rásimdegen nesıeler sot sheshiminsiz esepten shyǵarylatynyn jazǵanbyz.