Murat Ábenov: Aımaq basshylary ıdeologııalyq salany umytpaýy kerek
«Ulttyq keńestiń ereksheligi – qoǵamdy tyńdaı bilý, qoǵamda bolyp jatqan jaǵdaıdy durys baqylap, únin estip, soǵan qatysty shara qabyldaý desek, ortalyq deńgeıde bul mehanızm jumys isteýdi bastady. Al biraq óńirlik deńgeıde qoǵam men bıliktiń ortasynda durys qarym-qatynas joq. Keshe ǵana Jambyl oblysyna barǵanda baıqaǵanymyz - jergilikti bılik azamattardyń únin áli tolyq estip otyr dep aıta almaımyz. Aldyn ala ártúrli sıgnaldar bolǵanymen, oǵan qatysty shara qabyldaý máselesi keshiktirilgen», - dedi Murat Ábenov Eýrazııalyq ıntegratsııa ınstıtýtyndaǵy «Ulttyq qoǵamdyq senim keńesi: taldamalyq zerdeleý» atty saraptamalyq baıandamanyń tanystyrylymynda.
Onyń aıtýynsha, ózindik pikirin aıta biletin azamattar Ulttyq keńeske kirip, halyqtyń pikirin jetkizý arqyly bılik tıisti sharalardy qabyldap jatyr. Áıtse de Ulttyq keńes múshesi dál osy tendentsııany óńirlerge aparý kerek dep esepteıdi.
«Óńirlerdegi jergilikti bılik ókilderiniń jumysy belsendi bolmaǵannan keıin árıne, problema ýshyǵyp ketedi. Sol sebepti Ulttyq keńes jumysynyń keıbir modelin ol jaqqa baryp otyrys ótkizbeı-aq, jergilikti jerge bere bilýi kerek sekildi. Mysaly qazir jergilikti ákimderdiń osy ýaqytqa deıin ázirge ıdeologııalyq jumysqa aralaspaıtyny baıqalady. Ákimder kóbinese kásipkerlik nemese sharýashylyq turǵyda ekonomıka jaǵyn oılaıdy. Al saıası ózgeristerge daıyn emes. Sondyqtan keıbir oqys oqıǵalardyń aldyn alý, adamdardy bir-birimen kelistirý, halyqtyń aldyna shyǵyp oıyn jetkizý problemalary bar. Sol sebepti, meniń oıymsha, óńirlerdi basqaratyn basshylar ıdeologııalyq salany umyt qaldyrmaýy kerek», - deıdi ol.
