Muragerlik máselesinde sharıǵat talaptary basshylyqqa alynatyn boldy
ASTANA. QazAqparat - Ulybrıtanııada Anglııa men Ýelstiń kásibı zańgerleriniń Law Society atty qaýymdastyǵy qorǵaýshylar úshin zań tájirıbesinde sharıǵat talaptaryn basshylyqqa alýdyń qaǵıdalaryn ázirledi. Osyǵan oraı muragerlikke qatysty sharıǵı talaptar Brıtanııanyń quqyq júıesiniń bir bóligine aınalatyn boldy, dep habarlady www.muslim.kz.
Atalmysh qujattyń mátinine kóz júgirtseńiz, «túrli nekeden týǵan balalar arasynda muragerlik máselesinde aıyrmashylyq bolmaıdy, alaıda, nekesi qıylmaǵan juptardan týǵan bala nemese asyrap alǵan bala sharıǵat boıynsha murager bola almaıdy» dep aıtylǵan. Sondaı-aq, «Murager er adam bolsa, kóptegen jaǵdaıda murager áıelge qaraǵanda muranyń eki esesine ıe bola alady». Taǵy bir jerinde: «Al, ajyrasqan erli-zaıyptylar sharıǵat talaptary boıynsha murager bola almaıdy...»,- dep aıtylǵan.
Kásibı zańger qaýymdastyǵynyń bul qadamy keıbir quqyqqorǵaýshylar men femınıster tarapynan qatań synǵa ushyrap otyr. Olar zań tájirıbesinde dinniń talaptaryn eskerýdiń qajeti joq dep esepteıdi.
Máselen, Ulttyq zaıyrly qoǵamnyń atqarýshy dırektory Kıt Potes Výd muny keri ketý dep baǵalady.
Alaıda, kásibı zańgerler onyń sózimen kelispedi. «Halqymyzdyń turmys-tirshiliginde dinı ári mádenı faktorlar mańyzdy oryn alady. Sol sebepti, biz osyndaı qadamǵa bardyq»,- dedi atalmysh qaýymdastyqtyń prezıdenti Nıkolas Flak.
