Mura bólisý tártibine ózgeris engizý kerek — sarapshy
ASTANA. KAZINFORM — Qazaqstanda jańa Azamattyq kodeksti ázirleý barysynda muragerlik quqyqqa qatysty normalardy jetildirý usynyldy. Bul týraly QR Zańnama jáne quqyqtyq aqparat ınstıtýty konstıtýtsııalyq zańnama jáne memlekettik basqarý bóliminiń bas ǵylymı qyzmetkeri, zań ǵylymdarynyń doktory Ermek Abdrasýlov málimdedi.
Zańger Memleket basshysy Qasym-Jomart Toqaevtyń Qazaqstan halqyna Joldaýynda jarııalanǵan jańa Azamattyq kodeksti ázirleý bastamasyn qoldaıtynyn bildirdi.
Onyń pikirinshe, azamattyq zańnamany jańartý muragerlik quqyqtyq qatynastar salasyn da qamtýy kerek. Bul rette mura qaldyrýshynyń erki men muragerlerdiń zańdy múddeleri arasyndaǵy ádil teńgerimdi qamtamasyz etý mańyzdy.
Ermek Abdrasýlov muragerlik quqyqtyń negizgi qaǵıdattarynyń biri ósıet qaldyrý bostandyǵy ekenin atap ótti. ıAǵnı menshik ıesi ózine tıesili múliktiń qaıtys bolǵannan keıingi taǵdyryn derbes aıqyndaýǵa quqyly. Alaıda bul quqyqty júzege asyrý kezinde muragerlerdiń jekelegen sanattaryn qorǵaýdyń zańnamalyq kepildikteri, sonyń ishinde muradaǵy mindetti úleske quqyq eskerilýge tıis.
— Mura qaldyrýshynyń jeke múlki men erli-zaıyptylardyń ortaq múlkin ajyratý máselesi de erekshe nazar aýdarýdy qajet etedi. Muranyń quramyn aıqyndaý kezinde osy talaptyń saqtalmaýy tiri qalǵan jubaıdyń jáne ózge de muragerlerdiń múliktik quqyqtarynyń buzylýyna ákelýi múmkin, — dedi zańger.
Onyń aıtýynsha, jańa Azamattyq kodeksti ázirleý kezinde birqatar máseleni naqty ári júıeli retteý qajet. Atap aıtqanda, muranyń quramyn aıqyndaý, muradaǵy mindetti úleske quqyqty iske asyrý, erli-zaıyptylardyń múliktik quqyqtaryn qorǵaý, murany is júzinde qabyldaý jáne muragerlik daýlar kezinde azamattardyń quqyqtary men zańdy múddelerin qorǵaý tetikterin jetildirý usynylyp otyr.
— Bul saladaǵy zańnamanyń mindeti — menshik ıesiniń óz múlkine bılik etý erkindigin shekteý emes, onyń shynaıy erkin eskere otyryp, ózge de múddeli tulǵalardyń quqyqtarynyń saqtalýyn qamtamasyz etetin tıimdi quqyqtyq tetikterdi qalyptastyrý. Muragerlik quqyqty jetildirý — azamattardyń múliktik quqyqtaryn qorǵaýdyń, otbasylyq daýlardyń aldyn alýdyń jáne quqyqtyq aıqyndyqty qamtamasyz etýdiń mańyzdy sharty, — dep túıindedi Ermek Abdrasýlov.
Aıta keteıik, buǵan deıin zańger Aqtóre Orazaeva jańa Azamattyq kodekste muragerlikke qatysty daýly máselelerdi naqty retteý qajettigin aıtqan edi. Onyń pikirinshe, murany qabyldaý kezinde marqumnyń qaryzy men muragerlerdiń jaýapkershiligi de eskerilýi tıis.