Muny zerdeleımiz – Memqyzmet agenttigi komandasymen kóshetin basshylar jaıly

Ortalyq kommýnıkatsııalar qyzmetinde ótken brıfıngide Memlekettik qyzmet isteri agenttigi tóraǵasynyń orynbasary Azamat Jolmanov komandasymen kóship baratyn basshylarǵa qatysty saýalǵa jaýap berdi, dep habarlaıdy Kazinform.

Baspasóz máslıhaty barysynda BAQ ókili Azamat Jolmanovqa: «Qandaı da bir qyzmetke aýyssa, óziniń eks-komandasyn alyp baratyndar bar. Máselen, Sý resýrstary jáne ırrıgatsııa mınıstri Nurjan Nurjigitov óziniń burynǵy orynbasaryn vıtse-mınıstr etip aldy. Zańnamada komandasymen kóship baratyndarǵa shekteý qoıatyn norma bar ma?» - dep saýal qoıdy.

Buǵan qatysty jaýap bergen agenttik tóraǵasynyń orynbasary mundaı shekteýdiń joq ekenin málimdedi.

«Zańnamada mundaı shekteý joq. Tipti, halyqaralyq tájirıbede de «komandasymen kóship barý» sııaqty túsinik joq. Óz kezeginde, zańǵa engiziletin árbir másele aldyn ala zerdeleýdi talap etedi», - dep jaýap qatty Azamat Jolmanov OQK-de ótken brıfıngide.

Eske salaıyq, Sý resýrstary jáne ırrıgatsııa mınıstri Nurjan Nurjigitov Jambyl oblysynyń ákimi bolǵan kezdegi orynbasary Erbolat Ybraıhanovty mınıstrlikke nege alyp kelgenin túsindirgen bolatyn.

Qosa keteıik, bıyl memlekettik qyzmet bedeline nuqsan keltirgen 92 maman jaýapqa tartyldy. Al jalpy 9 aıdyń qorytyndysy boıynsha ádep keńesterinde memlekettik qyzmetshilerge qatysty 300-den astam tártiptik is qaralǵan.