Mýndıal-2018: Úrjarlyq aqyn ár matchqa óleń arnap júr

Biz telefon shalǵanda ol bazardan qurylys materıalyn alyp júr eken. Qoly bosaǵanda ózi habarlasatynyn aıtty. Kóp kútken de joqpyz, aqedil aqyn áńgime tizginin aǵytyp áketti.

Aıjaryq Ábilqasymov Jarbulaq aýylynda muǵalim bolyp jumys isteıdi. Ádebı ortaǵa «Saǵynǵan kózdiń monshaǵy», «Júrekte búgin syzat kóp», «Mahabbatym meniń», «Eń baqytty shaqtarym», «Kóńildarııa» jyr jınaqtarynyń avtory retinde tanylǵan ustazdy aýyldastary sport sarapshysynan kem kórmeıdi. Óıtkeni, ol ár oıynǵa óleń arnap qana qoımaı, saıysqa túsken komandalardyń aıaq alysyn tarazylap, taldaýdy ádetke aınaldyrǵan.

«Fýtbol keshinen alǵan áserimdi erteńinde oqýshylaryma óleńmen jetkizip, solarmen birge oıyndardy talqylap júrgenbiz. Keıin túngi oıyndarǵa uıqysyn qımaǵan úlkender kóshede ushyrasa qalsa, oıynnyń nátıjesin suraıtyndy shyǵardy. Kezinde aıtyspen áýestengendikten, alǵan áserimdi óleńmen jetkizý maǵan asa qıyndyq týǵyzbaıdy. «Aqsaqal, beri kelińiz» dep shaqyryp alam da, oıynnyń qalaı órbigenin beınelep jetkizip berem. UBT tapsyrǵan balalardyń kóńilin aýlaý úshin de saǵattap fýtbol jaıly áńgime aıtyp berdim ótkende» - deıdi aqyn. Degenmen, ol fýtbol chempıonatyna arnaǵan óleńderiniń bárin shedevr týyndylar deýden aýlaq.

«Fýtbolǵa arnaǵan óleńderimniń kóbi ázilge qurylǵan. Sondyqtan jazylǵan boıda aýyl balalary talap áketip júr. Kóbi este qalmapty» - dep biraz oılanyp turdy.

«Alańdatqan qos top shyqty alańǵa,

Fantastıka-fýtbol degen adamǵa!

Saı tasyndaı jigitter tur sap túzep,

Tolqyn atqan toqsan mınýt bar alda.

Sətti kútip serippedeı kelesi,

Tyna qaldy tynymsyz sət keńesi.

Taýtekedeı baspen soqqan jigitti

Sary qaǵazben salqyndatty tóreshi.

Tolqyp qaldy tolqyn tobyr jan-jaqta,

Tynysh əli tymyraıǵan tor qaqpa.

Býra sandar burqyldatyp soqqanmen,

Ońaı emes, olja salý qarmaqqa!

Temir jilik tepti dopty qaıyryp,

Eı, qorǵaýshym, qaqpashynyń jaıyn uq!

Oıbaılaıdy osal jerin kórgendeı,

Óńsheń qyzba óńeshterin aıyryp.

Yrshıdy ýaqyt yńǵaıǵa bir kelmegen

Yrǵalady stadıon kernegen.

Jer sharynyń jarty tusy órekpip,

Ushyp bara jatyr ómir jelmenen.

Turǵan jigit tulpar syndy qaqpada,

Atylǵanda uqsaıdy ol oqqa da.

Shań qaptyrǵan shabýyldyń qıyn-aı,

Top etkizer torǵa dopty joq shara!

Aıyp saldy aq tóreshi sotqarǵa,

Qarsylasyn qarbalasta qaqqanda.

Əı, ədira qalar ómir bylaıǵy,

Aıyp dobyn soǵatuǵyn shaqtarda!

Qadalǵan dop qalt etkizbeı tur kópti,

Budyr taban buryla kep burq etti!

Ortekedeı orǵyp tústi qaqpashy,

Qyrsyqqanda qara muny, múlt ketti!

Sý keýdeler syrǵyp shyǵyp saqtana,

Sýsyp barǵan suq saýsaqtaı shappaǵa.

Sońǵy sətte ker sadaqtaı kerilip,

Solq etkizdi sodyr dopty er jigit,

Qyz úıindeı qyrsyǵy kóp qaqpaǵa!

Gol!!!

Upaı boldy ustaradaı mańdaıǵa,

Orta toldy oıbaı menen aıqaıǵa...

Aıaqtaldy-aý ala doptyń aıqasy,

Uqsap baryp urandaǵan maıdanǵa». Bul aqynnyń chempıonat bastalar sátte jazǵan óleńi eken.

Al Islandııa men Horvatııanyń tartysyn bylaı dep órnektepti:

«Mine, qara, minez qandaı Horvatta,

Alaqtaıdy túlki ýaqyt  jan-jaqqa.

Batpan doby týlap jatyr Badeldiń

Aqtabandar ilingendeı qarmaqqa».

Goll!!!

Mynaý Perıshıch, bir baǵytta bop bári, Burq etkizdi tymyraıǵan qaqpany!

Uıpa-tuıpa jatyr batyr jigitter,

Qandaı qymbat ómirdiń bul shaqtary!

Nıgerııa qaqapasyna Messıdiń salǵan aıyp doby qaqpa torymen birge Aıjaryq aqynnyń júregin de búlk etkizgen sııaqty:

«Qarashy, dos kóńilińmen kólem qyp,

Fýtbol degen - bıiktik pen tereńdik.

Argentına abyroıyn súıregen

Messıdiki - mahabbatty sheberlik!

Ol klassıka  ala dobyn meńgerip,

Dóńgeletti dúnıeni óńgerip.

Nıgerııa-Argentına oıyny

Este qaldy Reseıden jel kelip,

O, qudiret, Messı salǵan soqqan sol goldan

Aspen men Jer turǵandaı-aý terbelip!».

Aqynnyń Brazılııa quramasyn alǵa súırep júrgen Neımar men Koýtınoǵa degen kóńili de alabóten.

«Súrinedi, ne boldy osy Neımarǵa?

Kele almaı júr belgili bir baılamǵa.

Basta alǵa, Brazılııa balasy,

Qyran bolsań, ilip áket, oılanba»!

«Ýh, tartylǵan ishke demiń sát qana,

90-mınýt qoı bul, joq shara!

Koýtıno soqqan sońǵy mınýtta

Brazılııa súńgip ketti qaqpaǵa!»

«Kerek deseńiz, fýtbol da - poezııa! Shahmat, fýtbol, poezııa. Bul úsheýi - qatty uqsas dúnıeler. Úsheýine de bas kerek, úsheýine de minez kerek. Al fýtboldyń artyqshylyǵy, minez ben basqa fızıka úndesýi tıis. Sol úshin fýtboldy súıem. Onda ómirge degen qushtarlyq, optımızm bar. Jeńilip jatqan komandanyń jeńisti julyp áketýi, Messı, Neımar sııaqty sheberlerdiń jalǵyz-aq soqqymen oıyn taǵdyryn sheshýi kórkem týyndy emeı nemene». Baldaq taıanǵan aqyn fýtbol týraly osylaı uzaq tebirendi. Onyń 11 jyl boıy tósek tartyp jatýy, jalpy qıly taǵdyry óz aldyna bólek bir maqalanyń júgi.

Keıipkerimiz bıylǵy dúrmekte kimniń top jaratynyn da boljap qoıypty.

«Meniń boljamym boıynsha fınalǵa Horvatııa men Meksıka shyǵady. Al kýbok Horvatııaǵa buıyrýy tıis» - deıdi Aıjaryq aqyn. Ony ýaqyt kórseter...